शाहरुख खानने अनुष्का शर्मा अन् कॅटरिना कैफला घडविली सायकल रिक्षाची स्वारी!

शाहरुख खान, अनुष्का शर्मा आणि कॅटरिना कैफ आगामी ‘झिरो’ या चित्रपटात झळकणार आहेत. या सेटवरील एक फोटो समोर आला असून, त्यामध्ये किंग खान या दोघींना सायकल रिक्षाची स्वारी घडवून आणताना दिसत आहे.

सहा वर्षांपूर्वी बॉलिवूडचा किंग शाहरुख खानचा ‘जब तक है जान’ हा चित्रपट रिलीज झाला होता. या चित्रपटात शाहरुखव्यतिरिक्त कॅटरिना कैफ आणि अनुष्का शर्मा यांच्या प्रमुख भूमिका होत्या. या तिघांची जोडी प्रेक्षकांना इतकी पसंत आली होती की, हा चित्रपट बॉक्स आॅफिसवर हिट ठरला. आता पुन्हा एकदा हे तिघे एकत्र आले आहेत. होय, आगामी ‘झिरो’ या चित्रपटात हे तिघे स्क्रीन शेअर करताना दिसणार आहेत. सध्या या चित्रपटाची शूटिंग जोरात सुरू आहे. चित्रपटाचे दिग्दर्शन आनंद एल. राय करीत असून, तिन्ही कलाकारांकडून ते प्रत्येक सीन परफेक्ट शूट करण्याची धडपड करीत असताना दिसत आहेत. सध्या या चित्रपटाच्या सेटवरील एक फोटो समोर आला असून, त्यामध्ये शाहरुख कॅट आणि अनुष्काला चक्क सायकल रिक्षाची स्वारी घडवून आणताना दिसत आहे. शाहरुख सायकल रिक्षा चालवित असून, मागच्या सीटवर अनुष्का आणि कॅट बसलेली आहे. विशेष म्हणजे, या दोन्ही सौंदर्यवती शाहरुखची स्वारी एन्जॉय करताना दिसत आहेत. खरं तर बादशाहसोबत वेळ व्यतीत करणे हे कुठल्याही कलाकारासाठी सुखदच आहे. या तिघांनी डेनिम जीन्स घातलेली असून, त्यावर व्हाइट रंगाचा शर्ट परिधान केला आहे. त्यामुळे कदाचित हा सीन चित्रपटाचाच एक भाग असावा.  हा फोटो शाहरुखने त्याच्या ट्विटर अकाउंटवर शेअर केला आहे. ‘झिरो’ चित्रपटाच्या सेटवर शाहरुख नेहमीच मस्तीच्या मूडमध्ये असतो. नुकतेच त्याने चित्रपटातील सर्व कलाकारांसोबत मकरसंक्रांत हा सण साजरा केला होता. यावेळी त्याने पतंगबाजीचा भरपूर आनंदही घेतला होता. शाहरुख या चित्रपटात एका बुटक्या व्यक्तीच्या भूमिकेत दिसणार आहे. त्याचा हा चित्रपट २१ डिसेंबर रोजी रिलीज होणार आहे.