शकीला बायोपिकची प्रेक्षक उत्सुकतेने वाट पाहत आहेत. साऊथच्या एडल्ट चित्रपटांची अभिनेत्री शकीला हिच्या जीवनावर आधारीत हा बायोपिक असून यात तिच्या भूमिकेत अभिनेत्री रिचा चड्ढा दिसणार आहे. या बायोपिकचे दिग्दर्शन इंद्रजीत लंकेश करत आहेत. या चित्रपटाचा आणखीन एक पोस्टर नुकताच लाँच करण्यात आला आहे.
शकीला बायोपिकच्या निर्मात्यांनी नवीन वर्षाच्या सुरूवातीला अनोखे पोस्टर प्रदर्शित केले आहे. या पोस्टरमध्ये दारूच्या ग्लासात डुबलेली शकीला सर्वांना शुभेच्छा देत आहे की इस साल का जाम, शकीला के नाम. हा पोस्टर पाहिल्यानंतर प्रेक्षक या चित्रपटाबाबत खूप उत्साही झाले आहेत. शकीलाची भूमिका साकारताना आलेल्या अनुभवांबद्दल रिचाने सांगितले की, मी शकीला बायोपिकमध्ये काम करताना खूप एन्जॉय केले आहे. हा सिनेमा मी आतापर्यंत केलेल्या सिनेमांपेक्षा वेगळा आहे. त्यांच्या जीवनात आलेले चढउतार सिनेमामध्ये पाहायला मिळणार आहेत. ज्या गोष्टी सांगायच्या आहेत, त्या सर्व गोष्टींचा समावेश सिनेमात करण्यात आला आहे. सर्व गोष्टी लपवून चित्रपट बनवण्यात काय अर्थ आहे. या चित्रपटात शकीला देखील दिसणार आहेत. त्या केमिओ करणार आहेत. दिग्दर्शक लंकेशने नंतर शकीला यांना चित्रपटात घेण्याचा निर्णय घेतला.