अभिनेता श्रेयस तळपदेने मराठीबरोबरच हिंदी सिनेसृष्टीही गाजवली. 'अपना सपना मनी मनी', 'हाऊसफुल', 'ओम शांती ओम', 'गोलमाल अगेन', 'इक्बाल', 'कौन प्रविण तांबे?' अशा सिनेमातून त्याच्या अभिनयाच्या छटा पाहायला मिळाल्या. आता श्रेयस नव्या सिनेमातून प्रेक्षकांच्या भेटीला येत आहे. 'करतम भुगतम' असं श्रेयसच्या नव्य सिनेमाचं नाव असून नुकताच सिनेमाचा ट्रेलर प्रदर्शित करण्यात आला आहे.
श्रेयसने त्याच्या सोशल मीडियावरुन 'करतम भुगतम' सिनेमाचा ट्रेलर शेअर केला आहे. "फक्त १० दिवसांसाठी न्यूझीलंडहून माझ्या शहरात आलो होतो. पण, एका ज्योतिषाने मला सांगितलं की मी कधीच इथून जाऊ शकत नाही. मी इथे अडकलो आहे. मी कधी परत जाऊ शकेन का? की कधीच नाही", असं श्रेयसने पोस्टमध्ये म्हटलं आहे. या सिनेमात तो देव जोशी हे पात्र साकारताना दिसणार आहे.
'करतम भुगतम' या सिनेमाच्या ट्रेलरमध्ये देव जोशी हे पात्र साकारणारा श्रेयस परदेशातून भारतात काही कामासाठी परतल्याचं दिसत आहे. पण, १० दिवसांसाठी आलेला देव अडकून पडतो. त्यानंतर यातून बाहेर पडण्यासाठी तो ज्योतिषाची मदत घेत असल्याचं पाहायला ट्रेलरमध्ये पाहायला मिळत आहे. 'करतम भुगतम' सिनेमाचा १.४६ मिनिटांचा ट्रेलर उत्कंठावर्धक आहे. हा सिनेमा १७ मेला प्रेक्षकांच्या भेटीला येणार आहे. श्रेयसबरोबर या सिनेमात विजय राझ, मधू यांच्या महत्त्वाच्या भूमिका आहेत.