सिद्धार्थ मल्होत्रा हा बॉलिवूडमधील लोकप्रिय अभिनेता. स्टूडंट ऑफ द इयर, शेरशाह, योद्धा अशा सिनेमांमधून सिद्धार्थने त्याच्या अभिनयाची आणि अॅक्शची तगडी झलक सर्वांना दाखवली. सिद्धार्थचे सिनेमे म्हणजे त्याच्या चाहत्यांसाठी रोमान्स, अॅक्शन आणि थ्रिलरची पर्वणी असते. सिद्धार्थचा यावर्षी रिलीज झालेला सिनेमा योद्धाला प्रेक्षकांचा संमीश्र प्रतिसाद मिळाला. आता नुकतंच सिद्धार्थच्या आगामी सिनेमाची खास घोषणा झालीय. या सिनेमात सिद्धार्थ आजवर कधीही न पाहिलेल्या अवतारात दिसणार यात शंका नाही.
सिद्धार्थ मल्होत्राचा नवीन सिनेमा
सिद्धार्थ मल्होत्राच्या नवीन सिनेमाची घोषणा सोशल मीडियावर करण्यात आलीय. यात सुरुवातीला एक पाटी दिसते. त्यावर लिहिलं असतं की, "सूर्यास्तानंतर प्रवेश वर्जित" पुढे हातात मशाल आणि लुंगी परिधान करुन एक व्यक्ती संपूर्ण जंगलात फेरफटका मारत असलेला दिसतो. त्याच्या मशालीच्या प्रकाशाने संपूर्ण जंगल उजळून निघतं. याशिवाय जंगलात एक भव्य मंदिर दिसतं. शेवटी जंगलातील गर्द झाडीत दोन डोळे प्रकट होतात. अशाप्रकारे रहस्यमयी थ्रिलर कथानक असलेला Vvan सिनेमाची घोषणा करण्यात आलीय.
सिद्धार्थच्या करिअरला मिळणार कलाटणी?
विशेष गोष्ट म्हणजे पंचायत, कोटा फॅक्टरी अशा वेबसीरिज करुन लोकांच्या पसंतीस आलेली कंपनी TVF ने या सिनेमाची निर्मिती केलीय. जोडीला एकता कपूर आणि शोभा कपूर या सिनेमाच्या सहनिर्माती आहेत. ओटीटी विश्वात स्वतःचा दबदबा निर्माण करणारी TVF या प्रॉडक्शन कंपनीचा हा पहिला सिनेमा असणार आहे, जो थिएटरमध्ये रिलीज होईल. २०२५ ला छठ पूजेच्या मुहुर्तावर हा सिनेमा सिनेमागृहांत रिलीज होईल. Vvan या सिनेमामुळे सिद्धार्थच्या करिअरला नवी कलाटणी मिळेल असं सांगण्यात येतंय.