धडकन, मोहरा,बॉर्डर, दिलवाले असे एक ना अनेक सुपरहिट चित्रपट देणारा अभिनेता म्हणजे सुनील शेट्टी(Suniel Shetty). आपल्या अभिनयशैलीच्या जोरावर प्रेक्षकांच्या मनावर राज्य करणाऱ्या सुनीलचा कलाविश्वातील वावर आता पूर्वीपेक्षा कमी झाला आहे. त्यामुळे त्याच्या कमाईचं साधन काय हा प्रश्न अनेकांना पडतो. परंतु, कलाविश्वापासून दूर असूनही सुनील प्रचंड लक्झरी लाइफस्टाइल जगतोय. सध्या सोशल मीडियावर त्याच्या खंडाळामधील बंगल्याचा एक व्हिडीओ व्हायरल झाला आहे. या घरावरुन त्याच्या लाइफस्टाइलचा अंदाज सहज लावता येत आहे.
सुनील शेट्टीचं मुंबईप्रमाणेच खंडाळ्यातही मोठं घर आहे. प्रचंड आलिशान आणि प्रशस्त असलेल्या या बंगल्याला जहान (Jahaan) असं नाव देण्यात आलं आहे. सध्या या घराचा एक व्हिडीओ सोशल मीडियावर व्हायरल होत असून सुनील त्याच्या घराची झलक या व्हिडीओमध्ये दाखवत आहे.
'Where The Heart Is Season' या युट्यूब शोमध्ये सुनीलने त्याच्या घराची झलक दाखवली आहे. विशेष म्हणजे या घरात मोठ्या प्रमाणावर झाडं लावण्यात आली आहेत. तसंच घरातील प्रत्येक कोपरा अन् कोपरा सुंदररित्या सजवण्यात आला आहे. इतकंच नाही या घराचं छप्पर सनरुफप्रमाणे बसवण्यात आलं आहे. त्यामुळे हे छत कधीही ओपन करता येऊ शकतं.
दरम्यान, सुनीलचं घर बरोबर डोंगरांच्या मध्ये वसलेलं आहे. या घरात डायनिंग रुम, बाल्कनी, स्विमिंग पूल, लॉन, बाग, मिनी थिएटर अशा सगळ्या सोयीसुविधा आहेत.