Sushant Singh Rajput Pet Dog Fudge Dies : सुशांत सिंग राजपूत नावाचा एक गुणी अभिनेता आपण कधीच गमावला. सुशांतने कथितरित्या आत्महत्या करून आयुष्य संपवलं. पण जातांना तो अनेकांना दु:खाच्या खाईत लोटून गेला. त्याच्या जाण्याने अनेकांच्या आयुष्यात कधीही भरून न निघणारी पोकळी निर्माण झाली आहे. अगदी त्याचा लाडका कुत्रा Fudge हाही सुशांतच्या आठवणीत रात्रंदिवस झुरला. आता त्याचाही मृत्यू झाला आहे. सुशांतनंतर Fudge ही हे जग साेडून गेला. सुशांतची बहिण प्रियंका सिंग हिने याची माहिती दिली आहे. प्रियंकाने ट्विटरवर दोन फोटो पोस्ट करत त्याच्या निधनाची बातमी दिली.
“खूप दूर गेलास फज! अखेर तू पण तुझ्या मित्राजवळ (सुशांतसिंह जवळ) स्वर्गात पोहोचलास. आपण लवकरच भेटू, तोपर्यंत…” असं कॅप्शन देत तिने दोन फोटो शेअर केले आहेत. एका फोटोत फज सुशांतसोबत दिसतोय. तर, दुसरा फोटो प्रियंकाचा आहे. ती फजच्या शेजारी बसलेली दिसत आहे. २१ जानेवारीला फजचा वाढदिवस होता, पण त्याआधीच तो सोडून गेला
फजसोबत सुशांतचं अत्यंत भावनिक नातं होतं. सुशांत तासन् तास त्याच्यासोबत खेळायचा. मस्ती करायचा. त्याला अंगाखांद्यावर घेऊन प्रेम करायचा. मात्र सुशांतच्या मृत्यूनंतर फज एकटा पडला होता. सुशांतच्या मृत्यूनंतर कित्येक दिवस फज सतत त्याचा फोटो जवळ घेऊन बसलेला असायचा. सुशांत गेल्यानंतर अनेक दिवस त्याने काहीही खाल्ले नव्हते.
दरम्यान, प्रियंकाच्या या ट्वीटवर नेटकरी कमेंट्स करून फजला श्रद्धांजली वाहत आहेत. ‘देव त्याच्या आत्म्याला शांती देवो’, ‘भावपूर्ण श्रद्धांजली’ अशा कमेंट्स नेटकऱ्यांनी केल्या आहेत. सुशांतच्या चाहत्यांनी सुशांतचे फजसोबतचे अनेक व्हिडिओ शेअर केले आहेत.