बॉलिवूड अभिनेता सुशांत सिंग राजपूतच्या आत्महत्येमुळे सगळीकडे खळबळ माजली आहे. त्याने वांद्रे येथील त्याच्या राहत्या घरी गळफास लावून आत्महत्या केली. त्याच्या आत्महत्येमागे कोण जबाबदार आहे, यावरून सोशल मीडियावर नेपोटिझमला विरोध होताना पहायला मिळाला. अद्याप त्याच्या आत्महत्येचे कारण समोर आलेले नसून पोलीस तपास करत आहेत. त्यात आता पोलिसांच्या हाती काही पुरावे लागल्याचे समजते आहे.
सुशांतच्या आत्महत्या प्रकरणात पोलिसांना कोणतीच सुसाइड नोट मिळाली नाही पण असे समजतंय की त्याच्या घरातून पोलिसांना महत्त्वाचे पुरावे सापडले आहेत. टाइम्स नाऊच्या रिपोर्टनुसार, पोलिसांना सुशांतच्या घरात त्याच्या पाच खासगी डायरीज मिळाल्या आहेत. या डायरीत लिहिलेल्या गोष्टींनुसार चौकशी केली जाणार आहे. या डायरीच्या माध्यमातून पोलीस त्याच्या आत्महत्येचे कारण शोधण्याचा प्रयत्न करणार आहेत. मीडिया रिपोर्टनुसार सुशांत डायरीमध्ये पुस्तकांमध्ये वाचताना त्याला महत्त्वाच्या वाटलेले कोट लिहून ठेवत होता. सुशांतच्या डायरीनुसार काही जवळच्या लोकांची चौकशी होऊ शकते.