देशातील सामाजिक व राजकीय घडामोडींवर बेधडक मतं मांडणारी बॉलिवूड अभिनेत्री स्वरा भास्करने फहाद अहमदशी लग्न केलं आहे. कोर्ट मॅरेजनंतर स्वरा भास्करने हळद-मेहेंदी, कव्वाली नाईट आणि रिसेप्शन सोहळ्याचं आयोजनही केलं. काल गुरूवारी स्वराचं रिसेप्शन झालं. स्वरा व फहादच्या रिसेप्शनला काँग्रेस खासदार राहुल गांधी यांनी हजेरी लावली. दिल्लीचे मुख्यमंत्री अरविंद केजरीवाल, शशी थरूर, जया बच्चन असे अनेक दिग्गज स्वरा व फहादच्या रिसेप्शन सोहळ्यात पोहोचले. दिल्लीत आजोबांच्या फार्म हाऊसवर स्वरा व फहादचा रिसेप्शन सोहळा पार पडला.
सोशल मीडियावर स्वराच्या रिसेप्शनमधील फोटो आणि व्हिडीओ व्हायरल झाले आहेत. यादरम्यान, राहुल गांधी यांच्या व्हिडीओनं सर्वांचं लक्ष वेधून घेतलं आहे.
बॉलिवूड सेलिब्रिटी फोटोग्राफर विरल भयानीने राहुल गांधी यांचा रिसेप्शनमधील व्हिडीओ शेअर केला आहे. यावेळी त्यांनी नवविवाहित जोडप्याला शुभेच्छा दिल्यात. स्वरा आणि फहादसोबत फोटो काढले. शिवाय तेथे उपस्थित असलेल्या अनेकांशी गप्पा देखील मारल्या. सोशल मीडियावर राहुल गांधी यांचा व्हिडीओ व्हायरल झाला आहे. तो पाहून अनेकांनी स्वराला ट्रोल करण्यास सुरुवात केली आहे. टुकडे टुकडे गॅंगचे लोक एकत्र आलेत, अशी कमेंट एका युजरने केली आहे. याचा अर्थ असा होतो की शाहीनबाग आणि जेएनयूला यांचा पाठिंबा आहे असा होतो, असं एका युजरने कमेंटमध्ये म्हटलं आहे. मोदीजी को नहीं बुलाया, असा प्रश्न एका युजरने केला आहे.
काही दिवसांपूर्वी स्वराने सोशल मीडियावर पोस्ट करत कोर्ट मॅरेज केल्याची माहिती दिली होती. स्वराने अचानक लग्न केल्याचं पाहून अनेकांना आश्चर्याचा धक्का बसला होता. स्वराचा पती फहाद हा समाजवादी पक्षाचा युवा नेता आहे. २०२० साली झालेल्या एका आंदोलनाच्या दरम्यान स्वरा व फहादची भेट झाली होती.