​का नकोत इमरान हाश्मीला बोल्ड सिनेमे!

इमरान हाश्मी सध्या ‘बादशाहो’च्या रिलीजची प्रतीक्षा करतोय. अजय देवगण, इशा गुप्ता, इलियाना डिक्रूज आणि विद्युत जामवाल यासारखी भलीमोठी स्टारकास्ट असलेल्या या चित्रपटात इमरान एका महत्त्वपूर्ण भूमिकेत आहे. हा चित्रपट भारतावर लादण्यात आलेल्या आणीबाणीच्या पार्श्वभूमीवर आधारित आहे. तुम्ही जरा बारकाईने बघितल्यास, इमरानबद्दलचीएक गोष्ट तुमच्या नक्कीच लक्षात येईल. ती गोष्ट म्हणजे  अलीकडे चित्रपटांबद्दलची चॉईस बदलली आहे. होय, म्हणजे अलीकडे इमरान विषयआधारित चित्रपट निवडू लागला आहे. खरे तर ‘सीरिअल किसर’ अशी इमरानची बॉलिवूडमध्ये ओळख आहे. पण आता हॉट अन् बोल्ड चित्रपट निवडण्याऐवजी इमरान वेगळ्याच धाटणीचे चित्रपट निवडू लागला आहे. याचबद्दल इमरानला विचारण्यात आले. एका पत्रकाराने इमरानला त्याच्या ‘सीरिअल किसर’ या टॅगबदद्ल विचारले. त्यावर इमरानने यामागची सगळी कथाच सांगितले.  ‘सीरिअल किसर’चा अर्थ काय होतो, हे खरेच मला ठाऊक नाही. काही वर्षांपूर्वी मी मॉरिशसला गेलो होतो. तिथे मी एक टी-शर्ट खरेदी केले. त्यावर ‘सीरिअल किसर’ असे लिहिलेले होते. त्या काळात माझे एकापाठोपाठ एक असे चार बोल्ड सिनेमे प्रदर्शित झाले होते. त्या चित्रपटातील सगळे सीन्स माझ्यामते, सामान्य होते. पण कदाचित लोकांना ते सीन्स पचवायला जड गेलेत. लोकांनी त्यावर चर्चा सुरु केली आणि माझ्या नावापुढे ‘सीरिअल किसर’ हे विशेषण चिटकले ते चिटकले. काम करण्याआधी प्रेक्षकांना काय हवे, याचा विचार आपल्या देशात करावा लागतो. ‘सीरिअल किसर’चा किताब मिळाल्यानंतर मी एका सच्युरेशन पॉर्इंटवर पोहोचलो होतो. त्यामुळे  माझी ही इमेज मला चिटकून राहिल,असे चित्रपट करायचे नाहीत, असा निर्णय मी घेतला, असे इमरानने सांगितले.