‘शुद्ध देसी रोमान्स’ या सिनेमातून बॉलिवूड डेब्यू करणारी अभिनेत्री वाणी कपूर (Vaani Kapoor) हिच्याकडे सध्या अनेक सिनेमे आहेत. वाणीचा ‘बेल बॉटम’ नुकताच रिलीज झाला आणि आता ‘शमशेरा’ (Shamshera ) व ‘चंदिगड करे आशिकी’ (Chandigarh Kare Aashiqui)हे तिचे दोन सिनेमे प्रेक्षकांच्या भेटीस येत आहेत. या आगामी सिनेमांकडून वाणीला ब-याच अपेक्षा आहेत. शमशेरा व चंदिगड करे आशिकी या सिनेमात वाणी मुख्य भूमिकेत आहे. ‘शमशेरा’मध्ये तिच्यासोबत रणबीर कपूर आहे आणि ‘चंदिगड करे आशिकी’मध्ये ती आयुष्मान खुराणासोबत दिसणार आहे.
कालच वाढदिवस साजरा करणारी वाणी या दोन्ही सिनेमांबद्दल भरभरून बोलली. ‘माझ्या या येऊ घातलेल्या चित्रपटांसाठी मी खूपच उत्सुक आहे. शमशेरा व चंदिगड करे आशिकी हे दोन्ही सिनेमे रिलीजसाठी सज्ज आहेत आणि हे दोन्ही सिनेमे प्रेक्षकांचे मनोरंजन करतील, अशी आशा आहे. या चित्रपटात मी अगदी वेगळ्या अवतारात दिसणार आहे. साहजिकच प्रेक्षकांच्या प्रतिक्रिया जाणून घेण्यास मी उत्सुक आहे,’ असे वाणी म्हणाली. ‘शमशेरा व चंदिगड करे आशिकी या दोन्ही चित्रपटांसाठी वाणीने खूप मेहनत घेतली आणि ही मेहनत सार्थ ठरेल, असा विश्वास तिला आहे. या चित्रपटानंतर एक जोखिम पत्करणारी अभिनेत्री म्हणून प्रेक्षक तिच्याकडे बघतील, असे तिला वाटतेय.
ती म्हणते, ‘मी या दोन्ही चित्रपटांसाठी अथक मेहनत घेतली आहे. हे चित्रपट ज्या पद्धतीने बनवण्यात आले आहेत, त्याचा मला आनंद आहे. चित्रपट निवडताना मी अतिशय चोखंदळ असते. भूमिका किती मोठी आहे, यापेक्षा ती किती दमदार आहे, याकडे मी लक्ष देते. दर्जेदार कन्टेन्टला मी अधिक महत्त्व देते. मला शमशेरा व चंदिगड करे आशिकी या दोन्ही चित्रपटांचा अभिमान वाटतो. आशा करते की, हे चित्रपट मला उत्तम कलाकार हणून सादर करतील. जेथे मी माझी छाप पाडण्यास यशस्वी होईल.’