Watch Trailer : शाहरूख खानच्या ‘जब हॅरी मेट सेजल’चा ट्रेलर झाला रिलीज!

गेल्या काही दिवसांपासून जबरदस्त चर्चेत असलेल्या शाहरूख खान आणि अनुष्का शर्मा यांच्या ‘जब हॅरी मेट सेजल’ या चित्रपटाचा ट्रेलर रिलीज करण्यात आला आहे. या ट्रेलर अगोदर बरेचसे मिनी ट्रेलर रिलीज करण्यात आले आहेत. त्यामुळे चित्रपटातील पात्रांची या मिनी ट्रेलरमधून ओळख झाली. आता चित्रपटाचे मुख्य ट्रेलर रिलीज करण्यात आले असून, त्यामधून तुमच्या लक्षात येईल की, हॅरी आणि सेजल यांची भेट कशी झाली. यादरम्यान त्यांना कोणकोणत्या अडचणींचा सामना करावा लागला. त्याचबरोबर त्यांच्यात प्रेमांकुर कसे फुलत गेले आदी. खरं तर ट्रेलर बघून एक गोष्ट निश्चितपणे लक्षात येते, ती म्हणजे प्रेक्षकांना आगामी काळात एक हटके लव्हस्टोरी बघावयास मिळेल. चित्रपटाची कथा हॅरी म्हणजेच हरिंदर सिंग नेहरा या टूर गाइडची आहे. आपल्या परिवारापासून हॅरी यूरोप जाऊन तिथे टूर गाइड म्हणून काम करतो. पुढे त्याची भेट सेजल नावाच्या मुलीशी होती. तिला यूरोपची सैर घडवून आणताना तिच्या साखरपुड्याची अंगठी तिच्याकडून हरवली जाते. ही अंगठी शोधल्याशिवाय मायदेशी परतणार नसल्याचा ती निर्धार करते. पुढे यातून ज्या घटना घडत जातात, त्या अगदी मजेशीर असतात. दोन भिन्न विचारांचे लोक पुढे एकमेकांच्या प्रेमात पडतात. चित्रपटात अनुष्काने एका गुजराथी मुलीची भूमिका साकारली आहे. आता तिने या भूमिकेला कितपत न्याय दिला, हे येत्या काळात स्पष्ट होईलच. दरम्यान शाहरूख भारतात नसतानाच या चित्रपटाचा ट्रेलर रिलीज करण्यात आला आहे. सध्या शाहरूख त्याच्या परिवारासमवेत लॉस एंजिलिस येथे सुट्या एन्जॉय करीत आहे; मात्र सोशल मीडियावर ज्या पद्धतीने या ट्रेलरचे कौतुक होत आहे, त्यावरून शाहरूख हरकून गेला नसेल तरच नवल. असो, शाहरूख आणि अनुष्काविषयी सांगायचे झाल्यास हा या जोडीचा तिसरा चित्रपट आहे. या अगोदर त्यांनी ‘रब ने बना दी जोडी’ आणि ‘जब तक है जान’ या चित्रपटात काम केले. दोन्ही चित्रपटांमध्ये त्यांच्यातील केमिस्ट्री बघण्यासारखी होती. त्यामुळे ‘जब हॅरी मेट सेजल’ या चित्रपटात या दोघांना बघणे मजेशीर ठरेल. या चित्रपटाचे दिग्दर्शन इम्तियाज अली यांनी केले असून, हा चित्रपट ४ आॅगस्ट रोजी रिलीज होणार आहे.