‘ठग्स आॅफ हिंदोस्तान’मधील आमीर खानचा लूक बघून तुम्ही दंग व्हाल; सेटवरील लूक झाला लिक !

बॉलिवूडचा मिस्टर परफेक्टनिस्ट आमीर खान सध्या त्याच्या आगामी ‘ठग्स आॅफ हिंदोस्तान’ या चित्रपटाच्या शूटिंगमध्ये व्यस्त आहे. या चित्रपटात तो पहिल्यांदाच मेगास्टार अमिताभ बच्चन यांच्यासोबत स्क्रीन शेअर करणार आहे. प्रत्येक भूमिकेत जीव ओतून काम करणारा अभिनेता म्हणून ओळख असलेला आमीर याही चित्रपटात काहीशा अशाच अंदाजात सेटवर मेहनत घेताना दिसून येत आहे. यशराज बॅनरच्या या चित्रपटासाठी त्याने वजन कमी केले आहे, तसेच त्याच्या लूकवरही त्याने प्रचंड मेहनत घेतली आहे. बरेचसे लोक असा विचार करीत आहेत की, या चित्रपटात आमीर दाढी-मिशीच्या लूकमध्ये बघावयास मिळेल. परंतु सेटवरील लिक झालेल्या त्याच्या फोटोवरून चित्रपटात तो कोणत्या लूकमध्ये असेल, हे आता स्पष्ट झाले आहे. कारण या लिक झालेल्या फोटोंमध्ये त्याला ओळखणे अवघड होत आहे. जर्जर आणि फाटलेल्या कपड्यांमध्ये दिसत असलेला आमीर याही चित्रपटात आपल्या लूकवर एक्सपेरिमेंट्स करताना दिसत आहे. लांब केस आणि दाढीवाल्या लूकमध्ये आमीर खूपच हटके दिसत आहे. या भूमिकेसाठी वजन कमी करावे लागल्याने, तो या भूमिकेत खूपच फिट दिसत आहे. विजय कृष्ण आचार्य दिग्दर्शित या चित्रपटात आमीर लुटारूंच्या (पायरेट) भूमिकेत दिसणार आहे. त्याचे सेटवरील हे फोटो त्याच्या फॅन पेजवर शेअर केले असून, सोशल मीडियावर मोठ्या प्रमाणात व्हायरल होत आहेत. खरं तर या चित्रपटाविषयी लोकांमध्ये प्रचंड उत्सुकता आहे. गेल्या शुक्रवारीच (१५ सप्टेंबर) यशराज फिल्म्सने या चित्रपटाची रिलीज डेटची घोषणा केली. त्यांनी त्यांच्या अधिकृत ट्विटर अकाउंटवर लिहिले की, ‘दोन लिजेंड पहिल्यांदाच कधीही न बघितलेल्या अ‍ॅक्शन अ‍ॅडव्हेंचरमध्ये बघावयास मिळणार आहेत. हा चित्रपट ७ नोव्हेंबर २०१८ रोजी रिलीज होणार आहे.’दरम्यान, चित्रपटात आमीर आणि अमिताभ यांच्या व्यतिरिक्त कॅटरिना कैफ, फातिमा सना शेख यांच्याही प्रमुख भूमिका आहेत. या अगोदर ‘ठग्स आॅफ हिंदोस्तान’साठी आमीरने त्याचे नाक, कान टोचले होते. हिंदुस्तान टाइम्समध्ये प्रसिद्ध झालेल्या एका वृत्तानुसार असे सांगण्यात आले होते की, ‘आमीरचा हा लूक त्याच्या कॅरेक्टरची डिमांड आहे.’ एका सूत्राचा हवाला देताना सांगण्यात आले होते की, आमीर खानला नाक, कान टोचताना प्रचंड त्रास सहन करावा लागला. यामुळे त्याला झोपतानाही त्रास होत होता. चुकून कानाला किंवा नाकाला कोणाचा स्पर्श झाल्यास त्याला प्रचंड त्रास व्हायचा. त्यामुळे कदाचित त्याचा हा अंदाजदेखील या चित्रपटात बघावयास मिळण्याची शक्यता आहे. दरम्यान, आमीरचा हा लूक सध्या सोशल मीडियावर चर्चेत असून, त्याच्या चाहत्यांना चित्रपटाविषयी प्रचंड उत्सुकता लागली आहे.