'चला हवा येऊ द्या' या लोकप्रिय कार्यक्रमाच्या माध्यमातून घराघरात पोहोचलेला अभिनेता म्हणजे सागर कारंडे (sagar karande). उत्तम अभिनयशैली आणि विनोदाचं अचूक टायमिंग साधणारा सागर आज प्रेक्षकांमध्ये विशेष लोकप्रिय आहे. त्यामुळे त्याच्याविषयी प्रत्येक माहिती जाणून घेण्यासाठी चाहते उत्सुक असतात. सागरच्या प्रोफेशनल लाइफविषयी जवळपास सगळ्यांनाच ठावूक आहे. परंतु, त्याच्या खासगी जीवनाविषयी माहिती जाणून घेण्यासाठी चाहते प्रयत्न करत असतात. यात पहिल्यांदाच सागरच्या घराचा व्हिडीओ समोर आला आहे.
आपले लाडके कलाकार राहतात कुठे, त्यांच्या कुटुंबात कोण कोण आहे, त्यांचं घर कसं असेल असं बरंच काही जाणून घेण्यासाठी चाहते कायम प्रयत्न करत असतात. यामध्येच सागरच्या घराची झलक पाहायला मिळाल्यामुळे चाहते चांगलेच खूश झाले आहेत.
सागरने अत्यंत साध्या पण तितक्याच नीटनेटकेपणाने त्याचं घर सजवलं आहे. सागरच्या घरात त्याच्या पुरस्कारांसाठी त्याने एक छान जागा केली आहे. सोबतच त्याने लाकडापासून तयार केलेलं टिव्ही युनिट घरात बसवलं आहे. या घरात हवा खेळती रहावी यासाठी मोठी, प्रशस्त अशी खिडकी आहे. ही खिडकी त्याच्यासाठी खूप खास असल्याचं म्हटलं जातं.
दरम्यान, सागर सोशल मीडियावर फारसा सक्रीय नाही. परंतु, नेटकऱ्यांमध्ये तो कायम चर्चेत असतो. आज लोकप्रियतेचं शिखर गाठणाऱ्या सागरनेही बराच स्ट्रगल केला आहे. इंडस्ट्रीत येण्यापूर्वी तो एका कंपनीत काम करायचा. या कंपनीत काम करण्यासोबतच तो नाटकात लहान-मोठ्या भूमिकाही साकारायचा. एकदा चर्चगेट येथे असलेल्या LIC च्या कार्यालयात त्याने एक छोटं नाटकं सादर केलं होतं. त्यासाठी त्याला १०१ रुपये मानधन मिळालं होतं. विशेष म्हणजे ही त्याची आयुष्यातील पहिली कमाई होती.