इंग्रजी जीईसी चॅनेल एएक्‍सएनने (AXN) पुढील महिन्‍यामध्‍ये सुरू होणाऱ्या अभूतपूर्व फूड शोसाठी सुप्रसिद्ध अभिनेत्री चित्रांगदा सिंगची निवड केली आहे. मेरिएट इंटरनॅशनल ही जगातील सर्वात मोठी आदरातिथ्‍य शृंखला आणि एएक्‍सएन इंडिया (AXN India) या इंग्रजी मनोरंजनपूर्ण शो सादर करणारी वाहिनी यासाठी एकत्र आली आहे. या सहयोगाच्‍या माध्‍यमातून प्रेक्षकांना मंत्रमुग्‍ध करणाऱ्या एका अभूतपूर्व पाककला शोची निर्मिती करण्‍यात येणार आहे.
चित्रांगदाने फूड अँड न्यूट्रिशन या विषयामध्ये पदवी शिक्षण घेतले आहे. ती एक अष्टपैलू अभिनेत्री असून ती दिसायला खूपच छान आहे. ती एक ग्‍लॅमरस अभिनेत्री म्हणून ओळखली जाते. या सगळ्यामुळे तिला या फूड शो साठी निवडण्यात आले आहे असे या कार्यक्रमाच्या टीमने सांगितले. इंग्रजी जीईसी सोबत काम करण्याचा चित्रांगदाचा हा पहिलाच अनुभव आहे. याविषयी ती सांगते, ''आपल्‍या जीवनामध्‍ये अन्‍न अत्‍यंत महत्‍त्‍वाचे आहे आणि मेरिएटचे शेफ्स अगदी आगळ्यावेगळ्या चवीचे पदार्थ बनवतात. मला नेहमीच पाककला, आपली संस्‍कृती आणि जगभरात प्रवास करण्‍याबाबत रुची राहिली आहे. याच आवडीमुळे मी हा कार्यक्रम करण्याचे ठरवले. या कार्यक्रमाने मला विविध पदार्थांचा स्‍वाद घेता येणार आहे. मेरिएट आणि एएक्‍सएनसोबतचा हा प्रकल्‍प जगातील सर्वोत्‍तम पाककलेचा स्‍वाद घेण्‍याची एक संधी आहे. कोण म्‍हणतं काम हे मजेशीर आणि स्‍वादिष्‍ट असू शकत नाही.''
‘हजारो ख्वाईशें ऐसी’ या चित्रपटाद्वारे हिंदी चित्रपटसृष्टीत पदार्पण केलेल्या या अभिनेत्रीने या चित्रपटातील अभिनयाबद्दल समीक्षकांकडून प्रशंसा मिळवलेली आहे. त्यानंतर अक्षय कुमारच्या ‘देसी बॉईज’ या चित्रपटातील तिच्या अभिनयाचे देखील कौतुक झाले होते. तिने आतापर्यंत अनेक चित्रपटांमध्ये भूमिका रंगविल्या असून आओ राजा आणि काफिराना यांसारख्या काही तुफान गीतांवरही ती थिरकली आहे.
चित्रांगदा सिंग या ग्‍लॅमरस अभिनेत्रीला लहान पडद्यावर प्रेक्षकांना लवकरच पाहायला मिळणार आहे. मेरिएट इंटरनॅशनल आणि एएक्‍सएन (AXN) या कार्यक्रमाची अधिकृत घोषणा लवकरच करणार असल्याचे त्यांच्या टीमने सांगितले.