‘कंडिशन्स अप्लाय’ ने जिंकली प्रेक्षकांची मनं!

कंडिशन्स अप्लाय’ या चित्रपटाला तरुणवर्गाची मोठ्या प्रमाणावर पसंती मिळत असल्याचे पाहायला मिळत आहे.

आजच्या तरुण पिढीचं जगणं मांडणाऱ्या ‘कंडिशन्स अप्लाय’ या चित्रपटाला तरुणवर्गाची मोठ्या प्रमाणावर पसंती मिळत असल्याचे पाहायला मिळत आहे. साधी सोपी कथा, कलाकारांचा दमदार अभिनय, श्रवणीय संगीत या चित्रपटाच्या जमेच्या बाजू ठरल्या आहेत. प्रेमात पडलेल्या आणि नात्यात गोंधळलेल्या अभय आणि स्वराची गोष्ट ‘कंडिशन्स अप्लाय’ चित्रपटामध्ये असून त्यांच्या नात्याची वाटचाल अधोरेखित करण्यात आली आहे. दोन जण एकत्र राहण्याचा निर्णय घेतात. सुरुवातीच्या काळात हवाहवासा वाटणारा एकमेकांचा सहवास कालांतराने कोणते वळण घेतो हे दाखवतानाच नात्यांमध्ये अपेक्षांच्या ओझ्यामुळे होणाऱ्या परिणांमावर ‘कंडिशन्स अप्लाय’मध्ये भाष्य करण्यात आले आहे. चांगली कलाकृती बनली, की प्रेक्षक तिला मनापासून दाद देतातच. संजय पवार यांचे लेखन, गिरीश मोहिते यांचे दिग्दर्शन, सुबोध भावे, दीप्ती देवी, अतुल परचुरे, अतिशा नाईक, मिलिंद फाटक, राजन ताम्हाणे, डॉ. उत्कर्षा नाईक, विनीत शर्मा या कलाकारांच्या अभिनयाने सजलेला ‘कंडिशन्स अप्लाय’ प्रेक्षकांची मने जिंकतो आहे.