शाहरुख खानच्या (Shahrukh Khan) करिअरमधला सर्वात सुपरहिट सिनेमा म्हणजे 'डॉन' (Don). फरहान अख्तर दिग्दर्शित 'डॉन' सिनेमाने शाहरुख खानला यशाच्या शिखरावर नेऊन पोहोचवलं. फरहान अख्तरने आता 'डॉन 3' (Don 3) चा एक टीझर रिलीज केलाय. त्यासोबतच एक पोस्ट शेअर केली आहे. 'डॉन 3' मध्ये शाहरुख नसल्याचं त्याने जाहीर केलंय. शाहरुखच्या जागी जो नवीन अभिनेता येतोय त्यालाही तितकंच प्रेम द्या अशी विनंती त्याने चाहत्यांना केली आहे.
गेल्या अनेक दिवसांपासून 'डॉन 3' ची चर्चा आहे. सिनेमाबद्दल अनेक अंदाज लावले जात होते. आता मेकर्सने सोशल मीडियावर एक टीझर रिलीज केला असून चाहत्यांची उत्सुकता वाढली आहे. एक्सेल एंटरटेन्मेंटने ३७ सेकंदांचा व्हिडिओ ट्वीट केला आहे. म्युझिकने व्हिडिओची सुरुवात होते. आणि स्क्रीनवर फक्त 3 हा आकडा दिसतो. तसंच 'द न्यु इरा बिगिन्स' असंही लिहून येतं.
यासोबत फरहान अख्तरने लांबलचक पोस्ट लिहिली आहे. तो लिहितो,'१९७८ मध्ये सलीम जावेद यांनी डॉन हे कॅरेक्टर उभं केलं. अमिताभ बच्चन यांनी तेवढ्याच ताकदीने ते निभावलं. २००६ मध्ये 'डॉन' हे कॅरेक्टर पुन्हा जीवंत करण्यात आलं आणि शाहरुख खानने त्याच्या चार्मने 'डॉन' साकारला. शाहरुख खानने डॉनचं चातुर्य यशस्वीपणे पुढे नेलं. आता डॉन सिरीजला पुढे नेण्याची वेळ आली आहे. मी ज्या अभिनेत्याचं टॅलेंट बघत आलोय असा अभिनेता डॉन ३ साठी जॉईन होत आहे. तुम्ही अमिताभ बच्चन आणि शाहरुख खान यांना जितकं प्रेम दिलं तितकंच प्रेम नवीन अभिनेत्यालाही द्याल अशी आशा आहे. डॉनचा नवीन इरा 2025 मध्ये येईल. बघत राहा.
सोशल मीडियावर हा व्हिडिओ व्हायरल झाला आणि 'डॉन 3' ट्रेंड व्हायला सुरुवात झाली. माध्यम रिपोर्ट्सनुसार 'डॉन 3' चा टीझर 'गदर 2' वेळी दाखवण्यात येणार आहे. मात्र याबद्दलही मेकर्सने अधिकृत घोषणा केलेली नाही.
शाहरुखच्या जागी दिसणार रणवीर सिंग?
'डॉन 3' मध्ये शाहरुखची जागा रणवीर सिंग घेणार असल्याची चर्चा आहे. 'डॉन' आणि 'डॉन 2' मध्ये शाहरुख खान आणि प्रियंका चोप्रा यांनी धमाल आणली होती. याच चित्रपटानंतर त्यांच्या अफेरअरच्या चर्चा सुरु झाल्या. त्यामुळे आता 'डॉन 3' शाहरुख नसेल तर सिनेमा होऊच शकत नाही असं चाहते म्हणत आहेत.