फुलवाची बॉलीवूडमध्ये एन्ट्री

पोस्टकार्ड, प्रियतमा, पोपट, झपाटलेला या मराठी चित्रपटांमध्ये कोरिओग्राफी केल्यानंतर फुलवा खामकर आता हिंदी चित्रपटसृष्टीकडे वळली आहे. लवकरच ती ज्युली २ या हिंदी चित्रपटामध्ये गणेश आचार्यसमवेत दाक्षिणात्य अभिनेत्री राय लक्ष्मीला स्वत:च्या तालावर नाचवणार आहे. छोट्या पडद्यावर ‘डीआयडी सुपर मॉम,’ ‘एकापेक्षा एक,’ ‘अप्सरा आली’ यांसारख्या रिअ‍ॅलिटी शोमध्ये काम करता करता फुलवाने थेट हिंदीमध्ये भरारी घेतली आहे. ज्युली २ या चित्रपटाचे दिग्दर्शन दीपक शिवदासानी करणार आहेत, तर या चित्रपटाची निर्मिती संदीप नायर यांची आहे. १९७५ मध्ये आलेल्या ज्युली या चित्रपटाचा हा सीक्वल असणार आहे. पहिलाच हिंदी चित्रपट असल्यामुळे फारच उत्साही व आनंदित असल्याचे फुलवाने म्हटले आहे.