यश राज बॅनरखाली बनलेला 'कैदी बँड' चित्रपटात काम केल्यानंतर आता अभिनेता आदर जैन पुन्हा एकदा हेलो चार्ली चित्रपटातून बॉलिवूडमध्ये पुन्हा एकदा नशीब आजमवण्यासाठी सज्ज झाला आहे. नुकताच अमेझॉन प्राइम व्हिडिओने ‘हेलो चार्ली’चा ट्रेलर प्रदर्शित केला. या विनोदी चित्रपटात जैकी श्रॉफ, आदर जैन, एलनाज नौरोजी आणि राजपाल यादव यांच्यासोबत पदार्पण करणारी अभिनेत्री श्लोका पंडित मुख्य भूमिकेत दिसणार आहे. या चित्रपटात आदर जैन गोरिलासोबत मिळून कॉमेडी करताना दिसणार आहे.
पंकज सारस्वत यांच्याद्वारे दिग्दर्शित आणि एक्सेल इंटरटेनमेंटचे निर्माते रितेश सिधवानी आणि फरहान अख्तर यांच्याद्वारे निर्मित ‘हेलो चार्ली’चा ट्रेलर एका अॅडव्हेंचर कॉमेडीच्या अनोख्या जगात आपल्याला घेऊन जातो ज्यामध्ये गोरिल्ला टोटो आणि भोळा चार्ली (आदर जैन) यांची मजेदार केमिस्ट्री पहायला मिळणार आहे. हा चित्रपट आपल्याला खुर्चीला खिळवून ठेवत एका कुतूहलपूर्ण प्रवास घडवतो ज्यामध्ये, एक करोडपती व्यक्तीच्या पलायन नाट्यावरून होणाऱ्या गोंधळाची संपूर्ण साखळी तयार होते आणि विचित्र अवस्था निर्माण करते.