Ghajini 2: आमिर खानचा ( Aamir Khan) ‘गजनी’ (Ghajini) हा एक क्लासिक सिनेमा. तुम्हीही या चित्रपटाचे फॅन असाल तर तुमच्यासाठी आनंदाची बातमी आहे. होय, येत्या काळात या चित्रपटाचा सीक्वल तुमच्या भेटीस येणार आहे. होय, तामिळचे सुप्रसिद्ध दिग्दर्शक एआर मुर्गदास (Ar Murugadoss) यांनी याबाबतचे संकेत दिले आहेत. 2005 मध्ये रिलीज झालेलया ‘गजनी’ या सुपरडुपर हिट तामिळ चित्रपटाच्या सीक्वलची तयारी मुर्गदास यांनी सुरू केली आहे. ‘गजनी’ हा मूळ तामिळ सिनेमा. यात सूर्या, आसिन व नयनतारा लीड रोलमध्ये होते. तीन वर्षानंतर 2008 मध्ये मुर्गदास यांनी याच चित्रपटाचा हिंदी रिमेक बनवला होता आणि यात आमिर खान, आसिन व जिया खान लीड रोलमध्ये होते.
दोन्ही भाषेतील या चित्रपटाने प्रेक्षकांना जणू वेड लावलं होतं. हिंदीतील हा चित्रपट बॉलिवूडमधील 100 कोटी क्लबमध्ये समाविष्ट होणारा पहिला चित्रपट ठरला होता. शॉर्ट टर्म मेमरी लॉस या आजारावर बेतलेल्या या चित्रपटानंतर आमिरने जोरदार प्रमोशन केलं होतं. अगदी रस्त्यावर उतरून तो लोकांना खास गजनी स्टाईल हेअर कट देताना दिसला होता. तीन वर्षाच्या ब्रेकनंतर एआर मुर्गदास दिग्दर्शनात कमबॅक करत आहेत आणि यासाठी त्यांनी ‘गजनी 2’ची निवड केली आहे. ‘बॉलिवूड हंगामा’ने दिलेल्या वृत्तानुसार, मुर्गदास यांनी ‘गजनी 2’वर काम सुरू केलं आहे. अद्याप त्यांनी या चित्रपटाची अधिकृत घोषणा केलेली नाही. पण चर्चा जोरात आहे. एकाचवेळी वेगवेगळ्या भाषेत हा चित्रपट रिलीज करण्याचा त्यांचा इरादा आहे. म्हणजे एकाचवेळी तामिळ, तेलगू, हिंदी, मल्याळम व कन्नड भाषेत हा चित्रपट रिलीज होईल.
आमिर नाही, सूर्याला मिळणार लीड रोल!‘गजनी 2’मध्ये कोणाची वर्णी लागणार? असा प्रश्न तुम्हाला नक्कीच पडला असेल. तर यात आमिर ऐवजी सूर्याची वर्णी लागू शकते. सूर्या हा मुर्गदास यांचा आॅल टाईम फेवरेट हिरो राहिला आहे. आमिरने ‘गजनी’तील भूमिकेत जीव ओतरला होता. पण तूर्तास तरी सूर्याचं पारडं जड आहे. या अ‍ॅक्शन थ्रीलर चित्रपटाच्या सीक्वलची कथा काय असेल? यात कोण कोण स्टार दिसणार? हे जाणून घेण्याची उत्सुकता चाहत्यांना आहेच. अर्थात त्यासाठी आणखी काही काळ प्रतीक्षा करावी लागणार आहे.