आपल्या उत्तम अभिनयशैलीच्या जोरावर प्रेक्षकांच्या मनात हक्काचं स्थान निर्माण करणारा अभिनेता म्हणजे हृतिक रोशन (hrithik roshan). हँडसम हंक हे नाव मिळवत हृतिक आज लाखो तरुणींच्या मनावर राज्य करतो. विशेष म्हणजे स्मार्टनेसच्या बाबतीत त्याचा लेकही त्याच्या पावलावर पाऊल ठेवत असल्याचं पाहायला मिळत आहे. अलिकडेच सुझानने तिच्या दोन्ही मुलांसोबतचा फोटो शेअर केला. यात तिच्या मोठ्या मुलाला पाहिल्यावर अनेकांनी तो हृतिकची कार्बन कॉपी असल्याचं म्हटलं आहे.
हृतिक आणि सुझानचा थोरला लेक रेहान याने नुकताच त्याचा १६ वा वाढदिवस साजरा केला. यावेळी सुझानने रिदान आणि रेहान या दोन्ही मुलांसोबतचा फोटो इन्स्टाग्रामवर शेअर केला. तसंच रेहानला वाढदिवसाच्या शुभेच्छाही दिल्या. त्याचा हा फोटो पाहिल्यावर तो हुबेहूब हृतिकप्रमाणेच दिसतो असं नेटकऱ्यांनी म्हटलं आहे.
"Whatever it takes..Here is to the adrenaline in my veins…Heartmonsters", असं कॅप्शन देत सुझानने हा फोटो शेअर केला. हा फोटो पाहिल्यावर हृतिकनंतर जर बॉलिवूडमध्ये कोणी हँडसम डूड असेल तर तो रेहान आहे, असं एका नेटकऱ्याने म्हटलं. तर, हा तर सेम हृतिकसारखा दिसतो असंही एका युजरने म्हटलं.
दरम्यान, २००० मध्ये हृतिक-सुझानचं लग्न झालं होतं. मात्र, १४ वर्षानंतर या दोघांनी विभक्त होण्याचा निर्णय घेतला. सध्या हे दोघंही आपआपल्या आयुष्यात पुढे वळाले आहेत. मात्र, त्यांच्या मुलांच्या संगोपनासाठी ते कायम एकत्र येत असल्याचंही पाहायला मिळतं.