उपेंद्र आणि नेहाची जमली जोडी

देहबोली आणि शब्दांचे अचूक टायमिंग साधत उपेंद्र लिमयेने केलेल्या अभिनयाची वेगळी झलक जश पिक्चर्स प्रस्तुत ‘नगरसेवक’ या आगामी चित्रपटात पाहता येईल. या चित्रपटात अभिनेत्री नेहा पेंडसे त्याला नायिकेच्या भूमिकेत साथ देणार आहे. मराठी आणि हिंदी चित्रपटांसोबतच दाक्षिणात्य चित्रपटांमध्ये नेहाने आपल्या सहजसुंदर अभिनयाने वेगळी ओळख निर्माण केली आहे. सध्या ती ‘मे आय कम इन मॅडम’ या हिंदी मालिकेतदेखील झळकत आहे.या मालिकेतील तिच्या भूमिकेचे सगळेच कौतुक करतात. नेहमी हॉट आणि ग्लॅमरस अंदाजात वावरणारी नेहा ‘नगरसेवक’मध्ये सोज्वळ भूमिकेतही तितकीच उठून दिसते. आपल्या चोखंदळ भूमिकेसाठी ओळखले जाणारे उपेंद्र लिमये आणि नेहा पेंडसे नगरसेवक या चित्रपटाच्या निमित्ताने पहिल्यांदाच एकत्र येत आहेत. नगरसेवक या चित्रपटाची निर्मिती शशिकांत चौधरी आणि जयश्री चौधरी यांनी केले असून दीपक कदम यांनी या चित्रपटाचे दिग्दर्शन केले आहे. उपेंद्र लिमये आणि नेहा पेंडसे यांच्यासोबतच सयाजी शिंदे, गणेश यादव, सुनील तावडे, संजय खापरे, सविता मालपेकर, विजय निकम, श्याम ठोंबरे, प्रियांका नागरे, त्रियोग मंत्री, अभिजित कुलकर्णी आदी कलाकारांच्या यात महत्त्वाच्या भूमिका आहेत. आजवर उपेंद्रने आशयप्रधान चित्रपटांमध्ये अतिशय सशक्त भूमिका साकारल्या आहेत. ३१ मार्चला प्रदर्शित होणाऱ्या नगरसेवक या चित्रपटात उपेंद्रने मल्हार या तडफदार तरुणाची भूमिका साकारली आहे. उपेंद्रची ही भूमिका प्रेक्षकांच्या पसंतीस उतरेल, यात काही शंका नाही.