अधिकाधिक लोकांपर्यंत पोहोचण्यासाठी कलाकार मंडळी सोशल मीडियाचा उत्तम वापर करतात. फेसबुक, इन्स्टाग्रामद्वारे कलाविश्वातील मंडळी चाहत्यांशी संवाद साधताना आपल्याला दिसतात. सोशल मीडियाचे बरेच फायदे आहेत. पण त्याचबरोबरीने काही तोटे सुद्धा आहेत. ज्यामुळे कलाकारांना विचित्र परिस्थितीचा सामना करावा लागतो. एखाद्या सेलिब्रिटीचे बनावट पेज तयार करून त्यांच्या चाहत्यांना फसवले जाते. असाच काहीचा प्रकार सोशल मीडियावर विशेष सक्रिय असणारी 'ठरलं तर फेम' अभिनेत्री जुई गडकरीसोबत घडला आहे.
जुई गडकरी सोशल मीडियावर खूप सक्रीय असते. सोशल मीडियावर तिचा मोठा चाहतावर्ग आहे. जुई नेहमी आपल्या इन्स्टाग्राम अकाऊंटवर व्हिडीओ, फोटो, त्याचसोबत ट्रेडिंग ऑडिओवर तयार केलेले रील शेअर करत असते. जुईचा चाहतावर्ग मोठा असल्याचे लक्षात घेऊन एकाने तिच्या नावाने बनावट इन्स्टाग्राम अकाऊंट उघडलं. एवढचं नाहीतर तिच्या चाहत्यांशी जुईच्या नावाने चॅटिंग करून त्यांची फसवणूक केली. अभिनेत्रीने स्वत: इन्स्टाग्रामवर स्टोरी शेअर करत तिच्या नावाने तयार करण्यात आलेल्या बनावट इन्स्टा अकाउंटबाबत चाहत्यांना माहिती दिली.
जुईनं याबाबत स्क्रीनशॉट शेअर करत चाहत्यांना आकाऊंट रिपोर्ट करण्याची विनंती केली. स्टोरीमध्ये तिनं लिहलं, 'एखाद्या सेलिब्रिटीचं फॅनपेज बनवणं वाईट नाही. परंतु, बनावट पेज बनवून माझ्या नावाने खोटं चॅटिंग करून फसवणूक करणं हे खूपच चुकीचं आहे. कृपया या अकाऊंटवर कोणालाही उत्तर देऊ नका…प्लीज रिपोर्ट या अकाऊंटला रिपोर्ट करा.माझं खरं अकाऊंट ब्लू टिक व्हेरिफाईड आहे आणि माझं युजरनेम @ juigadkariofficial असं आहे'.
यापुर्वीही जुईला एका तरूणीने फॉलोबॅक केलं नाही म्हणून धमकी दिली होती. त्यावर जुईनेही तिला चांगलंचं सुनावलं होतंं. दरम्यान, जुईच्या कामाबद्दल सांगायचं झालं, तर जुई ही पुढचं पाऊल या मालिकेतून प्रेक्षकांच्या घराघरात पोहोचली होती. पुढचं पाऊल मालिकेत जुईनं साकारलेली कल्याणी प्रेक्षकांना आवडली. आजही या पात्राची प्रेक्षक आठवण काढत असतात. पुढचं पाऊल नंतर सरस्वती, वर्तुळ, बिग बॉस मराठी आणि आता 'ठरलं तर मग' या मालिकेतून जुई गडकरी प्रेक्षकांच्या भेटीला आली आहे. 'ठरलं तर मग' मालिकेतील तिच्या सायली या पात्राला प्रेक्षकांचं भरभरुन प्रेम मिळत आहे.