ऑनलाइन लोकमत -
मुंबई, दि. १४ - अभिनेत्री करिना कपूरचा आगामी 'उडता पंजाब' चित्रपटामधील लूक प्रदर्शित करण्यात आला आहे. चित्रपटात करिना कपूर डॉक्टर शिवानी गुप्ताची भुमिका साकारत आहे. पोस्टरमध्येदेखील करिना कपूरला डॉक्टरच्या गणवेशात दाखवण्यात आले आहे. नुकताच शाहीद कपूरचा फर्स्ट लूक पोस्टरही रिलीज करण्यात आला होता. ज्यामध्ये तो ‘रॉकस्टार’च्या लूकमध्ये दिसत आहे.
करिना कपूरने याअगोदरही 'क्यों की' आणि 'थ्री इडियट्स' चित्रपटांमध्ये डॉक्टरची भुमिका निभावली आहे. चित्रपटाचे पोस्टर्स पाहून प्रेक्षकांमधील उत्सुकता वाढत आहे. चित्रपटाचं महत्वाच आकर्षण असणार आहे शाहीद आणि करिनाची जोडी. ब्रेकअपनंतर प्रथमच दोघे एकत्र काम करत असल्याने चित्रपटाबद्दल प्रेक्षकांमध्ये उत्सुकता आहे.
अभिषेक चौबे हे या चित्रपटाचे दिग्दर्शक आहेत. शाहीद आणि करिनासोबत या चित्रपटामध्ये आलिया भट, प्रभज्योत सिंग, दिलजीत दोसांझ यांच्याही मुख्य भुमिका आहेत. १७ जूनला हा चित्रपट प्रदर्शित होणार आहे.