Sidharth Malhotra-Kiara Advani wedding : सिद्धार्थ मल्होत्रा आणि कियारा अडवाणी आज लग्नबंधनात अडकणार आहेत. काल सिद्धार्थ कियाराच्या प्री वेडिंग सेरेमनीला सुरूवात झाली. हळद, मेहंदी, संगीत अशी सगळी धम्माल झाली. आज सिद्धार्थ व कियारा लग्नाच्या आणाभाका घेणार आहेत. तूर्तास या जोडप्याबद्दलच एक मोठ अपडेट आहे. लग्नानंतर मिस्टर ॲण्ड मिसेस मल्होत्रा समुद्राकाठीच्या एका नव्या घरात शिफ्ट होणार आहेत. अर्थात फक्त काही दिवसांसाठी.
मिड डेने दिलेल्या वृत्तानुसार, लग्नाच्या आधी काही महिन्यांपासून सिद्धार्थ एका नव्या घराच्या शोधात आहे. वृत्तानुसार, सिद्धार्थला कथितरित्या जुहूतील एक बंगला आवडला आहे. ३५०० चौ. फूटावर पसरलेल्या या बंगल्याची किंमत ७० कोटी असल्याचं कळतंय. अद्याप सिद्धार्थने हा बंगला फायनल केलेला नाही. सध्या सिद्धार्थ पाली हिल भागात एक सी फेसिंग अपार्टमेंटमध्ये राहतो. नवं घरही त्याला समुद्राच्या काठी हवं आहे.
सिद्धार्थ व कियारा दीर्घकाळापासून रिलेशनशिपमध्ये होते. या रिलेशनशिपमध्ये अनेक चढऊतार आलेत. पण सरतेशेवटी प्रेमाचाच विजय झाला आणि आज दोघंही लग्न करणार आहेत. राजस्थानच्या जैसलमेर येथील सूर्यगढ पॅलेसमध्ये हे जोडपं लग्न करतंय. करण जोहर, शाहिद कपूर, मीरा कपूर, आरती शेट्टी असे सगळे दिग्गज या लग्नाला हजर राहणार आहेत. काल ६ फेब्रुवारी रोजी मेहंदी आणि संगीत सोहळा पार पडला. संगीत नाईटसाठी सूर्यगढ पॅलेस गुलाबी रंगाने चमकला होता. पॅलेसचे फोटो सोशल मीडियावर व्हायरल होत आहेत.
जैसलमेरच्या सूर्यगढ पॅलेसबाहेर शस्त्रांसह सुरक्षारक्षक तैनात असणार आहेत. स्पेशल सिक्युरिटीही तैनात करण्यात आली आहे. याचं कारण आहे ते म्हणजे कियाराची बालपणीची मैत्रीण आणि मुकेश अंबानी यांची लेक ईशा अंबानी या विवाहसोहळ्यासाठी उपस्थित असणार आहे. ईशा कियाराची लहानपणीपासूनची खास मैत्रीण आहे. आपल्या बेस्ट फ्रेंडच्या लग्नासाठी ईशा जैसलमेरला पोहोचली आहे. यासाठीच कडक सुरक्षाव्यवस्था तैनात करण्यात आली आहे.