मुंबई - वादग्रस्त विधाने आणि ट्विट्ससाठी प्रसिद्ध असलेला बॉलीवूड अभिनेता कमाल आर खान (KRK) याला मुंबई पोलिसांनी अटक केली आहे. कमाल खान विरोधात मुंबईतील मालाड पोलिसांकडे तक्रार करण्यात आली होती. त्यानंतर मालाड पोलिसांनी कारवाई करत कमाल आर खान याला मुंबई विमानतळावरून ताब्यात घेतले आहे.
कमाल आर खान त्याच्या एका ट्विटमुळे अडचणीत सापडला आहे. एका वादग्रस्त ट्विटमुळे त्याच्याविरोधात अटकेची कारवाई करण्यात आली आहे. मालाड पोलिसांनी आधी त्याला विमानतळावरून ताब्यात घेतले. त्यानंतर चौकशी करत त्याला अटक केली.
कमाल आर खान याला २०२० मध्ये नोंद झालेल्या एका गुन्ह्यामध्ये ही अटक करण्यात आली आहे. कमाल खानने सोशल मीडियावरून धर्माबाबत वादग्रस्त ट्विट केल्याच्या त्याच्यावर आरोप आहे.
कमाल खान हा वादाच्या भोवऱ्यात सापडण्याची ही पहिलीच वेळ नाही आहे. वादग्रस्त ट्विटमुळे तो नेहमीच चर्चेत असतो. कमाल खान अगदी बिनधास्तपणे बॉलीवूडमधील अनेक बड्या अभिनेत्यांवर टीका करत असतो. अगदी सलमान खान आणि शाहरुख खान यांच्यावरही त्याने टीका केलेली आहे.