दिवाळीच्या निमित्ताने महाराष्ट्र नवनिर्माण सेने(MNS)च्या वतीने दादर येथील छत्रपती शिवाजी महाराज पार्क येथे भव्य दिपोत्सवाचे आयोजन केले होते. यावेळी राजकीय नेत्यांसोबत कलाकारांनीदेखील मनसे अध्यक्ष राज ठाकरे (Raj Thackeray) यांची भेट घेतली. यावेळी महाराष्ट्राची हास्यजत्रा(Maharashtrachi Hasyajatra)मधील कलाकारांनी देखील दिपोत्सवाला उपस्थिती लावली. यावेळी या कलाकारांना राज ठाकरे यांना भेटल्यानंतर आलेला अनुभव फोटो शेअर करत व्यक्त केला. या कार्यक्रमातील कॉमेडी क्वीन वनिता खरात (Vanita Kharat) हिने देखील इंस्टाग्रामवर राज ठाकरे यांच्यासोबतचा फोटो शेअर करून आपल्या भावना व्यक्त केल्या.
वनिता खरात हिने इंस्टाग्रामवर राज ठाकरे आणि राज ठाकरे यांचे पुत्र आणि मनसे नेते अमित ठाकरे यांच्यासोबतचे फोटो शेअर केले आहेत. हे फोटो शेअर करून तिने लिहिले की, दिवाळी विशेष. यावर्षीची दिवाळी खरंच खूप खास होती कारण शिवाजी पार्कच्या कट्ट्यावर बसून कित्येक वर्षे ज्या गोष्टीची वाट पाहिली ती गोष्ट घडली. शिवतीर्थावर जाण्याचा योग आला. कट्टा ते शिवतीर्थ हे २ मिनिटांचं अंतर पार करण्यासाठी १० वर्षे गेली...
तिने पुढे म्हटले की, कलेवर आणि कलाकारांवर मनापासून प्रेम करणारा "राजा माणूस" भेटला... राज साहेबांचं भेटणं, किस्से सांगणं, आमच्या कार्यक्रमावर असलेलं त्यांचं प्रेम हे सगळं भारावून टाकणारं होतं... हे सगळं शक्य झालं ते हास्यजत्रेच्या पुण्याईमुळे....
वनिता खरातच्या वर्कफ्रंटबद्दल सांगायचे तर तिने कॉमेडीची बुलेट ट्रेनमध्ये काम केले आहे. शाहिद कपूरच्या कबीर सिंग या चित्रपटात ती मोलकरणीच्या भूमिकेत झळकली आहे. यात तिची भूमिका छोटी असली तरी ती खूप चर्चेत आली होती. न्यूड फोटोशूटमुळेही तिच्या नावाची चांगलीच चर्चा झाली होती. महाराष्ट्राची हास्यजत्रा विनोदी कार्यक्रमातून ती प्रेक्षकांना हसून हसून लोटपोट करत असते.