Virajas Kulkarni Shivani Rangole Mehndi : मराठी मनोरंजन विश्वातील लोकप्रिय कपल विराजस कुलकर्णी (Virajas Kulkarni )आणि शिवानी रांगोळे ( Shivani Rangole) लवकरच लग्नबंधनात अडकणार आहेत. या लग्नविधींना सुरूवात झाली आहे.काल शिवानीचा मेहंदी सोहळा पार पडला. या मेहंदी सोहळ्याचे अनेक व्हिडीओ समोर आले आहेत. ‘लोकमत फिल्मी’ला मिळालेल्या या मेहंदी सोहळ्याच्या व्हिडीओंमध्ये शिवानी व विराजसच्या चेहऱ्यावरचा आनंद ओसंडून वाहतोय.मेहंदी सोहळ्यासाठी शिवानीने खास हिरव्या रंगाचा काठपदराच्या साडीचा ड्रेस निवडला होता. त्याला साजेसे फुलांचे दागिने तिच्या सौंदर्यात भर घालत होते. विराजस नेहमीच्या लुकमध्ये दिसला.
विराजस व शिवानी दीर्घकाळापासून रिलेशनशिपमध्ये आहेत. आपलं नातं त्यांनी कधीच जगापासून लपवून ठेवलं नाही. एका नाटकाच्या सेटवर या लव्हस्टोरीची सुरूवात झाली होती.
‘डावीकडून चौथी बिल्डिंग’ या विराजसच्या नाटकात शिवानीनं अभिनय केला होता. तेव्हाच त्यांची ओळख झाली. पुढे दोघांमध्ये चांगली मैत्री झाली आणि या मैत्रीचं रूपांतर प्रेमात झालं. विराजसनं ‘होस्टेल डेज’ या चित्रपटातून चित्रपटसृष्टीत पदार्पण केलं होतं. विराजस फक्त अभिनेता नाही तर तो एक दिग्दर्शकही आहे.
‘अनाथेमा’ या नाटकात त्यांनं अभिनयाबरोबर दिग्दर्शनाचीही जबाबदारी पेलली होती. तसंच रमा माधव चित्रपटासाठी मृणाल कुलकर्णी यांच्यासोबत सहाय्यक दिग्दर्शक म्हणून काम केलं होत. याशिवाय मिकी, डावीकडून चौथी बिल्डिंग, भंवर यासारख्या काही नाटकांचं लेखन आणि दिग्दर्शनही त्याने केलं आहे.
शिवानीबद्दल सांगायचं तर ‘बनमस्का’ मालिकेमुळे शिवानी रांगोळे हे नाव घराघरांत पोहोचलं. त्यानंतर तिने अनेक मालिकांमध्ये काम केलं. सांग तू आहेस ना,डॉक्टर बाबासाहेब आंबेडकर महामानवाची गौरव गाथा या मालिकांमध्ये ती झळकली.