'माझिया प्रियाला प्रित कळेना' या मालिकेच्या माध्यमातून घराघरात पोहोचलेली अभिनेत्री म्हणजे मृणाल दुसानीस. उत्तम अभिनयशैली आणि सौंदर्य यांच्या जोरावर मृणालने अल्पावधीत प्रेक्षकांची मनं जिंकून घेतली. त्यामुळे तिच्याविषयी प्रत्येकवेळी चाहत्यांमध्ये चर्चा रंगत असते. गेल्या काही दिवसांपासून मृणालने कलाविश्वापासून ब्रेक घेतला होता. त्यामुळे मृणालला पुन्हा एकदा पडद्यावर कधी पाहता येणार हा प्रश्न चाहत्यांना पडला होता. मात्र, या सगळ्या प्रश्नांमध्ये मृणालने मात्र, चाहत्यांना एक गुडन्यूज दिली आहे.
अभिनेत्री मृणाल दुसानीस नुकतीच आई झाली आहे. सोशल मीडियावर एक पोस्ट शेअर करत तिने तिच्या बाळाची माहिती दिली आहे. मृणालने एका मुलीला जन्म दिला असून तिच्या घरी कन्यारत्नाचं आगमन झालं आहे.
"Daddy’s little girl and mumma’s whole world ..!!! Our little princess has arrived..!! Nurvi .. 24.03.2022," असं कॅप्शन देत मृणालने ही गोडी बातमी चाहत्यांसोबत शेअर केली आहे. सोबतच तिने तिच्या बाळाचं नावही सांगितलं आहे.
दरम्यान, मृणालने तिच्या बाळाचं नाव नूरवी असं ठेवलं आहे. सोबतच तिने तिच्या चिमुकल्या बाळाचा एक फोटोही शेअर केला आहे. त्यामुळे सध्या सोशल मीडियावर या चिमुकल्या बाळाची चर्चा रंगली आहे. काही दिवसांपूर्वीच मृणालने तात्पुरता कलाविश्वातून ब्रेक घेतला होता.