अभिनेत्री अमृता खानविलकर(Amruta Khanvilkar)ने अभिनय कौशल्य आणि सौंदर्याच्या जोरावर रसिकांच्या मनात स्थान निर्माण केले आहे. तिने मराठीतच नाही तर हिंदी कलाविश्वातही आपलं स्थान निर्माण केले आहे. दरम्यान आता अभिनेत्रीने चाहत्यांना खूशखबर दिली आहे. तिने स्वतःचं घर घेतले आहे आणि या घराची झलक तिने सोशल मीडियावर शेअर केली आहे.
अभिनेत्री अमृता खानविलकर हिने इंस्टाग्रामवर घराचा व्हिडीओ शेअर करत लिहिले की, चला भेट झालीच आपली कधी काळी दूर कुठेतरी तुझं स्वप्न पाहिलं होतं, आणि ते पूर्ण करण्याचा प्रयत्न रोज सुरू होता. तर ही आपली पहिली दिवाळी….तुला खूप गोष्टी सांगायच्या आहेत, मला काय आवडतं, काय नाही, मनातलं गुपित, शांततेतलं ….सारं काही हळूहळू तुला कळेलच. तुलाही मला खूप काही सांगायचं असेल…माझी पूर्ण तयारी आहे.
तिने पुढे लिहिले की, तू अजून हळूहळू आकार घेतोयस, तुझ्या कानाकोपऱ्यात मी माझं सगळं जग बसवायचा प्रयत्न करतेय. तू ही अगदी माझ्या हो ला हो म्हणतोयस…. आवडतंय मला….. लवकरच भेटू नव्या कोऱ्या भिंतींसह नव्या आठवणी बनवण्यासाठी नवं आयुष्य उलगडण्यासाठी. दिवाळीच्या शुभेच्छा.
''माझ्यासाठी ही आनंदाची दिवाळी''
लक्ष्मीपूजनच्या निमित्ताने आणि नोव्हेंबरमध्ये माझा वाढदिवसाचा महिन्याच्या माझ्या नवीन घराची बातमी सांगताना मी अगदी नम्र आणि उत्सुक आहे “एकम” म्हणजे सुरुवात आणि ती खरोखरच प्रत्येक अर्थाने आहे. माझ्यासाठी ही खरोखरच खूप आनंदाची दिवाळी आहे, असे अमृताने पोस्टमध्ये म्हटले आहे. तिच्या या पोस्टवर चाहते अभिनंदनाचा वर्षाव करत आहेत.