द गाझी अटॅक या बॉलिवुड चित्रपटात अतुल कुलकर्णी

 सध्या बॉलिवुड चित्रपटात मराठी कलाकारांची चलती असल्याचे पाहायला मिळत आहे. नुकतेच दंगल या चित्रपटात गिरीश कुलकर्णी प्रेक्षकांना पाहायला मिळाले. आता हाच अभिनेता पुन्हा काबील या चित्रपटातदेखील दिसणार आहे. आता यांच्यापाठोपाठ प्रेक्षकांचा लाडका अभिनेता अतुल कुलकर्णीदेखील एका आगामी बॉलिवुड चित्रपटात झळकणार आहेत. द गाझी अटॅक  असे या चित्रपटाचे नाव आहे. या चित्रपटाचे दिग्दर्शन संकल्प रेड्डी यांनी केले आहे. नुकताच द गाझी अटॅक  या हिंदी चित्रपटाचा ट्रेलर सोशल मिडीयावर प्रदर्शित करण्यात आला आहे.  या चित्रपटात १९७१ साली म्हणजेच भारत पाकिस्तानाच्या युद्धा अगोदरची कथा मांडण्यात आली आहे. या चित्रपटामध्ये अतुल कुलकर्णी यांनी कार्यकारी अधिकारी देवराज एस २१ इंडियन नेव्ही यांची भूमिका साकारली आहे. अतुल कुलकर्णी बरोबर या चित्रपटात राणा दग्गुबती, तापसी पन्नू, के के मेनन, राहूल सिंग आदी कलाकार पाहायला मिळणार आहेत. नुकतेच अतुल कुलकर्णी हे आझाद या लघुपटात झळकले होते. या लघुपटात त्यांच्यासोबत साक्षी तन्वर, सिध्दार्थ मेननदेखील दिसले आहे. त्याचबरोबर अतूल यांनी हॅपी जर्नी, विराम, प्रेमाची गोष्ट, नटरंग, पोपट, देवराई असे अनेक चित्रपट मराठी इंडस्टीला दिले आहेत. त्याचबरोबर दिल्ली ६, पेज थ्री, रंग दे बसंती, ए मेरा इंडिया अशा अनेक बॉलिवुड चित्रपटात त्यांनी आपल्या अभिनयाची चुणूक दाखविली.  आता अतुल कुलकर्णीचा धर्मा प्रॉडक्शन आणि आ फिल्म्स प्रस्तुत द गाझी अटॅक हा चित्रपट १७ फेब्रुवारीला सर्वत्र प्रदर्शित होणार आहे.