Exclusive ​ वैभव-अमृताची जमणार जोडी

 प्रियांका लोंढे

       वैभव तत्ववादी आणि अमृता खानविलाकर या दोघांचीही जोडी जमणार आहे. आता या दोघांची जोडी जमणार म्हणजे नक्की काय या विचारात पडला असला तर ऐका, लवकरत आपल्याला हे दोघेही एका चित्रपटात एकत्र दिसणार आहेत. संजय जाधव दिग्दर्शीत एका आगामी मराठी चित्रपटामध्ये वैभव आणि अमृता ही रिफ्रेशींग जोडी प्रथमच मोठ्या पडदयावर झळकणार असल्याचे कळतेय. वैभव आणि संजय जाधव एकत्र काम करणार असल्याचे आम्ही तुम्हाला सांगितलेच होते. परंतू या चित्रपटामध्ये अभिनेत्री अमृता खानविलकर देखील प्रमुख भूमिकेत असल्याचे  नुकतेच समजले आहे. वैभवने हिंदी मराठी चित्रपटसृष्टी चांगलीच गाजविली आहे. तर अमृताच्या दिलखेचक अदांनी तिने रसिकांना नेहमीच घायाळ केले आहे. आता हे दोघेही संजय जाधवच्या चित्रपटानिमित्त एकत्र येणार असल्याने नक्कीच आपल्याला या दोघांची भन्नाट केमिस्ट्री रुपेरी पडदयावर अनुभवायला मिळणार आहे. संजय जाधव यांच्या चित्रपटांच्या कथा या नेहमीच वेगळ््या असतात. हटके प्रेमकथा पडदयावर रंगविण्यासाठी संजयला ओळखले जाते. त्याच्या दुनियादारी या चित्रपटातूनच हा अनुभव प्रेक्षकांना आला आहे. आता पाहूयात की या आगामी चित्रपटातून तो कोणता विषय समोर आणणार आहे. एक नवी प्रेमकथा प्रेक्षकांना लवकरच या चित्रपटाच्या निमित्ताने पाहायला मिळणार असल्याचे कळतेय. अमृता सध्या मॅड २ या डान्सिंग रिअ‍ॅलिटी शो मध्ये आपल्याला परिक्षकाच्या भूमिकेत लवकरच पाहायला मिळणार आहे. तर याच शो मध्ये दिग्दर्शक संजय जाधव देखील परिक्षकाच्या भूमिकेत असणार आहे. आता एकाच शो मध्ये अमृता आणि संजय काम करणार आहेत. त्यामुळे या दोघांमधील नाते अधिकच घट्ट व्हायला देखील मदत होणार आहे. त्यामुळे त्यांच्या आगामी चित्रपटासाठी त्यांची ही ट्युनिंग महत्वाची ठरणार आहे. पण आता प्रेक्षकांना मात्र नवीन वर्षात एक झक्कास जोडी लवकरच पाहायला मिळणार आहे.