गेल्या वर्षभरात प्रदर्शित झालेल्या मराठी चित्रपटांना आणि संबंधित विभागांना सन्मानित करणारा 'महाराष्ट्राचा फेवरेट कोण ?' (Maharashtracha Favourite Kon) हा पुरस्कार सोहळा लवकरच प्रेक्षकांच्या भेटीला येणार आहे. अनेक मराठी सेलिब्रिटींची ग्लॅमरस झलक या सोहळ्यात पाहायला मिळाली. 'झी टॉकिज'ने या सोहळ्याचा प्रोमो शेअर केला आहे. यामध्ये महाराष्ट्राची लाडकी वहिनी जिनिलिया देशमुखच्या (Genelia Deshmukh) त्या व्हिडिओमुळे पुन्हा एकदा प्रेक्षकांचं मन जिंकलं आहे.
रितेश देशमुख (Riteish Deshmukh) आणि जिनिलियाच्या 'वेड' सिनेमाने 2023 हे वर्ष गाजवलं. 'सैराट' नंतर याच सिनेमाने सर्वाधिक कमाई केली. 'वेड'ने एकूण 70 कोटींची कमाई करत वाहवा मिळवली. रितेशने सिनेमाचं जबरदस्त प्रमोशन केलं होतं. शिवाय त्याची आणि जिनिलियाची लाडकी जोडी यानिमित्ताने पुन्हा पडद्यावर एकत्र आली. दरम्यान 'महाराष्ट्राचा फेवरेट कोण' पुरस्कार सोहळ्यात 'वेड'नेही अनेक पुरस्कार पटकावले आहेत. हा संपूर्ण सोहळा तर लवकरच टेलिव्हिजनवर पाहायला मिळणार आहे. मात्र त्याआधी सोशल मीडियावर रितेश-जिनिलियाचा क्युट मोमेंट व्हायरल होतोय. यामध्ये जिनिलिया स्टेजवर असून तिच्या हातात ट्रॉफी आहे. ती माईक हातात घेऊन खाली प्रेक्षकांमध्ये बसलेल्या रितेशला पाहून हसतच म्हणते, "अहो...हा पुरस्कार तुमच्यासाठी नाहीए. आपल्या मुलांसाठी आहे." बायकोचं बोलणं ऐकून रितेशही शिट्टी वाजवतो.
रितेश जिनिलिया ही जोडी कधीच प्रेक्षकांना निराश करत नाही. त्यांचे क्युट क्षण कायम चाहत्यांचं मनोरंजन करत असतात. यंदाच्या 'महाराष्ट्राचा फेवरेट कोण?' मध्ये 'वेड' सिनेमाने तब्बल 9 पुरस्कारांवर मोहोर उमटवली आहे. त्यामुळे हे यश नक्कीच दोघांसाठी खास आहे. कारण जिनिलियाने 'वेड'मधून पहिल्यांदाच मराठी सिनेमात केले आहेत. तर रितेशने या सिनेमातून दिग्दर्शनात पदार्पण केले आहे. १८ फेब्रुवारी रोजी हा सोहळा पाहता येणार आहे.