मराठी मनोरंजन विश्वात एका सिनेमाची सध्या चांगलीच चर्चा आहे तो म्हणजे 'गुलाबी'. श्रृती मराठे, अश्विनी भावे आणि मृणाल कुलकर्णी या तीन अभिनेत्रींची सिनेमात प्रमुख भूमिका आहे. गेल्या अनेक दिवसांपासून सिनेमाच्या टीझर, ट्रेलरची सर्वजण वाट पाहत होते. सिनेमाच्या गाण्यांनी सध्या प्रेक्षकांचं लक्ष वेधलंय. अशातच काल मुंबईत ‘गुलाबी’ सिनेमाचा ट्रेलर लॉंच झाला. मैत्रीची अनोखी सफर दाखवणारा ‘गुलाबी’ सिनेमाचा ट्रेलर स्त्रियांच्या भावविश्वाची कहाणी आपल्यासमोर मांडतो.
‘गुलाबी’ सिनेमाचा ट्रेलर रिलीज
'गुलाबी' ही कथा फक्त मैत्रीची नसून, त्यांच्या वैयक्तिक संघर्षांची आणि आत्मसन्मानाच्या शोधाची गोष्ट आहे. या प्रवासात श्रुती मराठे, अश्विनी भावे आणि मृणाल कुलकर्णी यांच्या भूमिका मुख्य आहेत. तिघींच्या प्रवासाची रंगमय झलक ट्रेलरमध्ये दिसत असतानाच जयपूरमधील विविध रंगांचे आणि सौंदर्याचे दर्शनही घडत आहे. तीन महिला जयपूरला पिकनीकला एकत्र भेटल्यावर त्यांचं भावविश्व कसं उलगडत जातं, याची कहाणी ‘गुलाबी’च्या ट्रेलरमधून उलगडते.
या दिवशी रिलीज होणार 'गुलाबी'
अभ्यंग कुवळेकर यांनी दिग्दर्शित 'गुलाबी' या चित्रपटाची निर्मिती सोनाली शिवणीकर, शीतल शानभाग, अभ्यंग कुवळेकर आणि स्वप्नील भामरे यांनी व्हायोलेट फ्लेम मोशन पिक्चर्सच्या बॅनरखाली केली आहे. या चित्रपटात ज्येष्ठ अभिनेत्री सुहास जोशी, शैलेश दातार, आणि निखिल आर्या यांच्याही महत्त्वपूर्ण भूमिका आहेत. संगीतकार साई-पियुष यांचे संगीत चित्रपटाच्या भावनांना आणखी उजळवते, ज्यामुळे ही कथा प्रेक्षकांना अधिक भावते. २२ नोव्हेंबरला हा सिनेमा रिलीज होणार आहे.