आज कदाचित त्यांना हे कळणार नाही..., समीर वानखेडेंच्या वाढदिवसानिमित्त क्रांती रेडकरची पोस्ट

Kranti Redkars Post : आर्यन खान ड्रग्ज प्रकरणानंतर राज्याचे अल्पसंख्यांक मंत्री नवाब मलिक यांनी समीर वानखेडे यांच्यावर अनेक आरोप केलेत. या आरोपांच्या पार्श्वभूमीवर क्रांतीने पोस्ट शेअर केली आहे

एनसीबीचे (NCB) झोनल डायरेक्टर समीर वानखेडे (Sameer Wankhede) यांचा आज वाढदिवस. त्यांच्या वाढदिवसानिमित्त त्यांची पत्नी व मराठी अभिनेत्री क्रांती रेडकर (Kranti Redkar) हिने सोशल मीडियावर एक खास पोस्ट शेअर केली आहे.

आर्यन खान ड्रग्ज प्रकरणानंतर समीर वानखेडे एक ना अनेक वादात सापडले. राज्याचे अल्पसंख्यांक मंत्री नवाब मलिक यांनी समीर यांच्यावर अनेक आरोप केलेत. या आरोपांच्या पार्श्वभूमीवर क्रांतीने पोस्ट शेअर केली आहे. समीर वानखेडेंवर आरोप झालेत तेव्हा क्रांती त्यांच्या पाठीशी अगदी खंबीरपणे उभी राहिल्याचे दिसले. पत्रपरिषदद्वारे,सोशल मीडियाद्वारे तिने नवाब मलिकांचा प्रत्येक आरोप, प्रत्येक दावा खोडून काढला होता.

क्रांती लिहिते,
समीर वानखेडे, वाढदिवसाच्या शुभेच्छा. तुझ्याबद्दल, तुझ्या धडाडी आणि कामाबद्दल मी आजपर्यंत खूप काही लिहिले. परंतू आज मला शब्द कमी पडतायत. ड्रग्जच्या राक्षसासोबत लढा देणं वेगळं आणि हे करताना तुला तुझ्या कामापासून रोखू पाहणा-यांविरूद्ध लढा देणं वेगळं. हा एक मोठा संघर्ष आहे आणि तू दररोज याचा सामना करत, सर्वांना मात देत आहेस. तू खूप चांगल काम करतोय. समाजातील घाण स्वच्छ करून तरूणाईला योग्य मार्ग दाखवत आहेत, त्यांच्या भल्यासाठी खपतो आहेत. (आता कदाचित त्यांना हे कळणार नाही...) तुझ्यासोबत समस्त जनतेचा आशीर्वाद आहे. कारण सामान्य माणूस मुळातच हुशार आहे.   योग्य काय आणि अयोग्य काय, कोण खोटं आणि कोण खरं हे लोकांना बरोबर कळतं. तू फक्त तुझं काम करत राहा.  जे लोक खरोखर  समाजाची काळजी घेतात, आपल्या राष्ट्रावर प्रेम करतात आणि तुझ्यावर प्रेम करतात तेच लोक महत्त्वाचे आहेत..., अशा आशयाची पोस्ट क्रांतीनं लिहिली आहे.

शाहरुख खानचा मुलगा आर्यन खानला ड्ग्ज प्रकरणात अटक करण्यात आली. यानंतर एनसीबीचे विभागीय संचालक समीर वानखेडे लाचखोरीच्या आरोपांमुळे वादात सापडले. अल्पसंख्यांक मंत्री नवाब मलिक यांच्याकडून समीर वानखेडेंवर गंभीर आरोप केले जात आहेत. 

ट्विटरवरुन नबाव मलिकांनी समीवर वानखेडेंचा जन्मदाखला आणि पहिल्या लग्नाचा फोटो पोस्ट केला होता. यावरुन वानखेडे कुटुंब आणि नवाब मलिक यांच्यात आरोप-प्रत्यारोपांचे सत्र सुरू आहे. तेव्हापासून समीर वानखेडे हे नाव सतत चर्चेत आहे. त्याआधी सुशांत सिंग राजपूत मृत्यू प्रकरणानंतर बॉलिवूडचं ड्रग्स कनेक्शन समोर आलं होतं. तेव्हा समीर यांनी अनेक सेलिब्रिटींवर कारवाई केली होती. तेव्हाही ते चर्चेत होते.