'देऊळबंद', ‘सरसेनापती हंबीरराव’ अशा कितीतरी गाजलेल्या चित्रपटातून प्रेक्षकांच्या भेटीला आलेला अभिनेता म्हणजे गश्मीर महाजनी. उत्तम अभिनयशैलीच्या जोरावर प्रेक्षकांची मनं जिंकणाऱ्या गश्मीरने कलाविश्वात त्याचा एक स्वतंत्र चाहतावर्ग निर्माण केला आहे. त्यामुळे त्याच्या प्रोफेशनल लाइफमधील अपडेट जाणून घेण्यासाठी चाहते कायम उत्सुक असतात. त्यातच गश्मीर लवकरच एका चित्रपटात झळकणार असल्याचं समोर आलं आहे.
गश्मीरच्या आगामी प्रोजेक्टची प्रेक्षक कायमच आतुरतेने वाटत पाहत असतात. यामध्येच आता त्याच्या नवा चित्रपटाविषयीचे काही अपडेट्स समोर आले आहेत. त्यानुसार, आता गश्मीरचा विशू हा चित्रपट लवकरच प्रेक्षकांच्या भेटीला येणार आहे. विशेष म्हणजे या चित्रपटात त्याच्यासोबत मराठी कलाविश्वातील लोकप्रिय अभिनेत्री स्क्रीन शेअर करणार आहे.
मयूर मधुकर शिंदे दिग्दर्शित विशू या चित्रपटात गश्मीर झळकणार आहे. काही दिवसांपूर्वी या चित्रपटाचं पहिलं पोस्टर प्रदर्शित झालं होतं. हे पोस्टर पाहिल्यानंतर प्रेक्षकांच्या मनातील उत्सुकता कमालीची वाढली होती. त्यानंतर आता या चित्रपटाची रिलीज डेट समोर आली आहे. त्यानुसार, येत्या ८ एप्रिल रोजी हा चित्रपट प्रेक्षकांच्या भेटीला येणार आहे.
'विशू' या चित्रपटात गश्मीर विशू ही भूमिका साकारणार आहे. तर भाडिपा फेम अभिनेत्री मृण्यमी गोडबोले त्याच्यासोबत स्क्रीन शेअर करणार आहे. या चित्रपटाच्या निमित्ताने ही जोडी पहिल्यांदाच एकत्र झळकणार आहे. या चित्रपटातून विशूची प्रेमकथा उलगडली जाणार आहे.
दरम्यान, निसर्गरम्य कोकण आणि तिथे हळुवार खुलत जाणारी प्रेमकहाणी या चित्रपटातून प्रेक्षकांना पाहायला मिळेल. या चित्रपटात गश्मीर आणि मृण्मयी व्यतिरिक्त ऐताशा संझगिरी, मानसी मोहिले, मिलिंद पाठक, विजय निकम, संजय गुरबक्शानी, प्रज्ञेश डिंगोरकर हे महत्त्वपूर्ण भूमिकेत झळकणार आहेत.