'दुर्वा' होऊन 'फुलपाखरु'प्रमाणे कलाविश्वात स्वच्छंदीपणे बागडणारी लोकप्रिय अभिनेत्री म्हणजे हृता दुर्गुळे (Hruta Durgule) . उत्तम अभिनयशैली आणि सौंदर्याच्या जोरावर हृता अल्पावधीत महाराष्ट्राची क्रश झाली. त्यामुळे आज तिचा प्रचंड मोठा चाहतावर्ग असल्याचं पाहायला मिळतं. अनेक गाजलेल्या मालिकांमध्ये काम केल्यानंतर हृता लवकरच अनन्या ’ (Ananya) या चित्रपटाच्या माध्यमातून रुपेरी पडद्यावर पदार्पण करत आहे. विशेष म्हणजे तिच्या बहुप्रतिक्षीत ठरलेल्या या चित्रपटाचा टीझर नुकताच प्रदर्शित झाला आहे.
सोशल मीडियावर सक्रीय असलेल्या हृताने तिच्या पहिल्यावहिल्या चित्रपटाचा टीझर चाहत्यांसोबत शेअर केला आहे. या टीझरमध्ये चित्रपटाची थोडक्यात झलक दाखवण्यात आली आहे. सोबतच या चित्रपटाच्या प्रदर्शनाची तारीखदेखील जाहीर करण्यात आली आहे.
"देव कधीही चुकत नसतो, तो जादू करतो...पहा आनंदी 'अनन्या' चा हॅपनिंग टिझर..... अनन्या...." असं कॅप्शन देत हृताने हा टीझर शेअर केला आहे.
अनन्या या चित्रपटात हृताने अनन्या देशमुख ही भूमिका साकारली आहे. प्रचंड महत्वकांक्षी आणि आकाशात स्वच्छंदीपणे भरारी घेण्याचं स्वप्न अनन्याने उराशी बाळगलं आहे. अशा या अनन्याची कथा या चित्रपटात दाखवली जाणार आहे. प्रदर्शित झालेला टीझर प्रचंड हॅपनिंग असल्यामुळे सध्या तो सोशल मीडियावर व्हायरल होत आहे.
दरम्यान, येत्या २२ जुलै रोजी अनन्या हा चित्रपट प्रेक्षकांच्या भेटीला येणार आहे. या चित्रपटात हृतासोबत मराठी कलाविश्वातील अनेक दिग्गज कलाकार स्क्रीन शेअर करणार आहेत.