करण जोहर (Karan Johar) दिग्दर्शित 'रॉकी और रानी की प्रेम कहानी' (Rocky Aur Rani Ki Prem Kahani) या चित्रपटाचे जबरदस्त पोस्टर सोशल मीडियावर झळकले आहे. 'मीट द रंधवाज' अशी ओळख करून देणाऱ्या या पोस्टरमध्ये रणवीर सिंग,धर्मेंद्र, जया बच्चन या मोठ्या चेहऱ्यासोबतच एक मराठी चेहरा झळकत आहे. हा चेहरा म्हणजे मराठी सिनेसृष्टीतील यशस्वी अभिनेत्री, निर्माती क्षिती जोग (Kshitee Jog). या चित्रपटात क्षिती एका महत्वपूर्ण आणि रंजक भूमिकेत दिसणार आहे. क्षितीसाठी तिचा नवरा हेमंत ढोमेने खास पोस्ट शेअर केली आहे.
हेमंत ढोमे मराठीतील आघाडीचा अभिनेता आणि दिग्दर्शक आहे. त्याने दिग्दर्शित केलेला 'झिम्मा' सिनेमा चांगलाच गाजला. यामध्ये क्षिती जोगनेही भूमिका केली होती. क्षिती मराठीसोबतच हिंदीतही सक्रिय असते. तिने अनेक हिंदी मालिकांमध्ये भूमिका केल्या आहेत. तर आता तिला थेट करण जोहरचा सिनेमा मिळाल्याने तिच्यावर कौतुकाचा वर्षाव होतोय. बायकोची स्तुती करताना हेमंत म्हणाला, "आपली टायग्रेस मोठी झेप घेतेय! गो किल इट माय गर्ल, मला तुझा अभिमान वाटतो" असं कॅप्शन देत त्याने 'रॉकी और रानी की प्रेम कहानी'चं पोस्टर पोस्ट केलं आहे.
नवऱ्याने केलेल्या कौतुकावर क्षिती जोगनेही हसणारी कमेंट केली आहे. इतक्या मोठ्या स्टारकास्टसोबत काम करण्याच्या अनुभवाबद्दल क्षिती म्हणते, अनेक वर्षं रुपेरी पडद्यावर अधिराज्य गाजवणाऱ्या कलाकारांसोबत काम करण्याची संधी मला मिळाली आहे, ही माझ्यासाठी खूप मोठी गोष्ट आहे. ज्येष्ठच नाही तर आताच्या काळात सुपरहिट असलेला रणवीर सिंग, आलिया भट्ट यांच्यासोबत काम करतानाही धमाल आली."