​ पाहा या चित्रपटाचा संगीत प्रकाशन सोहळा

ती सध्या काय करतेय या चित्रपटाची सध्या सगळीकडेच जोरदार चर्चा सरु आहे. नुकताच या चित्रपटाचा संगीत सोहळा मोठ्या थाटामाटात पार पडला आहे. ती सध्या काय करतेच्या निमित्ताने मराठी चित्रपटसृष्टीतील सुपरस्टार अंकुश चौधरी आणि होणार सून मी ह्या घरची या मालिकेतून घराघरांत पोहचलेली अभिनेत्री तेजश्री प्रधान ही जोडी प्रथमच रुपेरी पडद्यावर एकत्र दिसणार आहे. तसेच महाराष्ट्राचे लाडके अभिनेते लक्ष्मीकांत बेर्डे यांचा मुलगा अभिनय बेर्डे आणि झी मराठी वरील सा रे ग म प लिटिल चॅम्प्समध्ये आपल्या गोड आवाजाने सर्वांना मंत्रमुग्ध करणारी गायिका आर्या आंबेकर यांची ही हॅपनिंग जोडी देखील यामध्ये पाहायला मिळणार आहे आणि विशेष म्हणजे या चित्रपटाच्या माध्यमातून हे दोघेही अभिनय क्षेत्रात पदार्पण करत आहेत. या चित्रपटात आदित्य राजवाडे, अभिनय बेर्डे,अंकुश चौधरी, निमोर्ही, आर्या आंबेकर, तेजश्री प्रधान, सुकन्या कुलकर्णी-मोने, संजय मोने, अनुराधा राजाध्यक्ष, प्रसाद बर्वे आणि तुषार दळवी या कलाकारांच्या महत्त्वाच्या भूमिकेत आहेत. झी स्टुडियोजचे निखिल साने आणि असंख्य प्रॉडक्शनच्या पल्लवी राजवाडे यांनी या चित्रपटाची निर्मिती केली आहे. चित्रपटाची कथा या चित्रपटाचे दिग्दर्शक सतीश राजवाडे यांची असून पटकथा आणि संवाद मनस्विनी लता रवींद्र यांचे आहेत. संकलन राहुल भाटणकर यांनी केले आहे तर सुहास गुजराथी यांचं छायालेखन आहे. झी स्टुडियोज निर्मित आणि सतीश राजवाडे दिग्दर्शित ती सध्या काय करते हा चित्रपट येत्या नववर्षाच्या पहिल्याच आठवड्यात म्हणजेच ६ जानेवारी २०१७ला प्रेक्षकांच्या भेटीस येत आहे.