Ved box office collection Day 24 : अभिनेता रितेश देशमुख ( Riteish Deshmukh) आणि अभिनेत्री जिनिलिया देशमुख (Genelia Deshmukh ) यांच्या 'वेड'ने बाॅलिवूड चित्रपटांना मागे टाकत बॉक्स ऑफिसवर अक्षरश: धुमाकूळ घातला आहे. साऊथच्या सिनेमाचा रिमेक असला तरी हा सिनेमा प्रेक्षकांच्या पसंतीत उतरला. इतका की, चित्रपट प्रदर्शित झाला आणि चित्रपटावर प्रेक्षकांच्या उड्या पडल्यात. परिणामी पहिल्या तीन आठवड्यातच या सिनेमानं ५० कोटींचा गल्ला जमवला. आता चौथ्या आठवड्यातही 'वेड'ची घोडदौड सुरूच आहे. रिलीजच्या २४ व्या दिवशीही या चित्रपटाने रेकॉर्डब्रेक कमाई केली आहे.
'वेड' ३० डिसेंबरला प्रदर्शित झाला होता. पहिल्याच दिवशी या चित्रपटाने २ कोटी २५ लाखांचा गल्ला जमवला. त्यानंतर पहिल्या आठवड्यात २० कोटींचा पल्ला गाठला. दुसऱ्या आठवड्याच्या शेवटी चित्रपटाने ४० कोटींचा टप्पा पार केला आणि तिसऱ्या आठवड्याच्या शेवटी चित्रपटाने तब्बल ५० कोटींची कमाई केली. चौथ्या आठवड्यात 'वेड'ची कमाई ५५.२२ कोटींवर पोहोचली आहे. प्रदर्शनाच्या २४ व्या दिवशीही (२२ जानेवारी रविवार) या चित्रपटाने जबरदस्त कमाई केली. रविवारी चित्रपटाने तब्बल १ कोटी ७० लाखांचा िबझनेस केला. याचसोबत 'वेड' ची एकूण कमाई ५५. २२ कोटींवर पोहोचली आहे.
सध्या बॉक्स ऑफिसवर बॉलिवूडचा कोणताही मोठा सिनेमा नाही. याचा फायदा 'वेड'ला मिळताना दिसतो आहे. येत्या २५ जानेवारीला 'पठाण' रिलीज होतोय. 'वेड'चा 'पठाण' समोर किती टिकाव लागतो, ते बघणं इंटरेस्टिंग असणार आहे.
'वेड' सिनेमा नागा चैतन्य आणि सामंथा यांच्या 'मजिली' या तेलुगू सिनेमावर आधारित सिनेमा आहे. रितेश आणि जिनिलिया यात मुख्य भूमिकेत आहेत. याशिवाय ज्येष्ठ अभिनेते अशोक सराफ, जिया शंकर, विद्याधर जोशी, शुभंकर तावडे असे कलाकारही या सिनेमात आहेत. अजय-अतुल यांनी संगीतबद्ध केलेली सिनेमातील गाणीही हिट ठरली आहेत. सलमान खान आणि रितेश देशमुखवर चित्रित झालेलं 'वेड लावलंय' या गाण्यानंही हवा केली आहे.