Shivani Rangole and Virajas Kulkarni Wedding : ज्येष्ठ अभिनेत्री मृणाल कुलकर्णी यांचा लेक व अभिनेता विराजस कुलकर्णी (Virajas Kulkarni)अखेर लग्नबंधनात अडकला. अभिनेत्री शिवानी रांगोळे(Shivani Rangole) हिच्यासोबत विराजसने लग्नाच्या आणाभाका घेतल्या. काल अक्षय तृतीयेच्या मुहूर्तावर या क्यूट कपलनं लग्नगाठ बांधली.या लग्नाचे काही फोटो व व्हिडीओ समोर आले आहेत. ‘फायनली’, असं लिहित विराजसने लग्नाचे काही फोटो शेअर केले आहेत. फोटोंमध्ये विराजस व शिवानी दोघंही दृष्ट लागावी इतके सुंदर दिसत आहेत. लग्नात शिवानीने लाल गोल्डन रंगाची भरजरी सिल्क साडी नेसली होती. तर विराजसही तिच्या या साडीला मॅचिंग अशा पारंपरिक पोशाखात होता.
लग्नाचे काही व्हिडीओही व्हायरल होत आहेत. यात विराजसच्या आई मृणाल कुलकर्णी दिसत आहेत. लेकाच्या लग्नात त्यांच्या चेह-यावरचा आनंद ओसंडून वाहतोय.शिवानी व विराजस दीर्घकाळापासून रिलेशनशिपमध्ये होते. डावीकडून चौथी बिल्डिंग या विराजसच्या नाटकात शिवानीनं अभिनय केला होता. तेव्हाच दोघांची ओळख झाली होती. या नाटकाच्या सेटवर त्यांची मैत्री झाली आणि मग ही मैत्री प्रेमात बदलली.
विराजसनं होस्टेल डेज या चित्रपटातून चित्रपटसृष्टीत पदार्पण केलं होतं. विराजस फक्त अभिनेता नाही तर तो एक दिग्दर्शकही आहे. अनाथेमा या नाटकात त्यांनं अभिनयाबरोबर दिग्दर्शनाचीही जबाबदारी स्वीकारली होती. तसंच रमा माधव चित्रपटासाठी मृणाल कुलकर्णी यांच्यासोबत सहाय्यक दिग्दर्शक म्हणून काम केलं होत. याशिवाय मिकी, डावीकडून चौथी बिल्डिंग, भंवर यासारख्या काही नाटकांचं लेखन आणि दिग्दर्शनही त्याने केलं आहे. शिवानीबद्दल सांगायचं तर बनमस्का मालिकेमुळे शिवानी रांगोळे हे नाव घराघरांत पोहोचलं. त्यानंतर तिने अनेक मालिकांमध्ये काम केले. सांग तू आहेस ना, डॉक्टर बाबासाहेब आंबेडकर महामानवाची गौरव गाथा या मालिकांमध्ये ती झळकली.