'शेर शिवराज' चित्रपटात अफजल खानाच्या भूमिकेत दिसणार हा बॉलिवूडचा अभिनेता

'शेर शिवराज' चित्रपटात छत्रपती शिवाजी महाराज यांनी अफझल खानाचा वध कसा केला हे पाहायला मिळणार आहे.

'फर्जंद'(Farzand), 'फत्तेशिकस्त' (Fateshikasta) आणि 'पावनखिंड' (Pawankhind) या चित्रपटांचे यशस्वी दिग्दर्शन करणाऱ्या दिग्पाल लांजेकर (Digpal Lanjekar) यांच्या 'शेर शिवराज' (Sher Shivraj Movie) चित्रपटाचा टीझर नुकताच रिलीज झाला आहे. 'शेर शिवराज' चित्रपटात छत्रपती शिवाजी महाराज यांनी अफझल खानाचा वध कसा केला हे पाहायला मिळणार आहे. या चित्रपटात शिवाजी महाराजांची भूमिका चिन्मय मांडलेकर(Chinmay Mandlekar)ने साकारली आहे. शेअर करण्यात आलेल्या टीझरमध्ये अफझल खानची छोटीशी झलक पाहायला मिळते. त्यामुळे अफझल खानच्या भूमिका कोण साकारणार याची उत्सुकता प्रेक्षकांना आहे. 

अफझल खानाने शिवाजी महाराजांना जिवंत किंवा मृत घेऊन येण्याचा विडा उचलला होता. इतिहासाच्या पानांत अफझलच्या क्रूरतेबद्दलही भरभरून लिहिण्यात आले आहे. त्यामुळे चित्रपटातील अफझलही त्याच तोडीचा असायला हवा यात काही शंका नाही.

'शेर शिवराज' सिनेमाच्या टीमने अजूनपर्यंत अफझल खानाची भूमिका कोण साकारणार आहे याचा खुलासा केलेला नाही. मात्र तरीही बॉलिवूडचे प्रसिद्ध अभिनेते मुकेश ऋषी हे अफझलची भूमिका साकारताना दिसणार असल्याची चर्चा आहे. मात्र याबाबत अजून कोणतीही अधिकृत घोषणा झालेली नाही. येत्या २२ एप्रिलला हा चित्रपट प्रदर्शित होणार आहे.

प्रतापगडावर डौलानं फडकणारा हिंदवी स्वराज्याचा भगवा झेंडा, महाराजांचा रक्तानं माखलेला हात, खानाचा कोथळा काढणारी वाघनखं आणि त्या काळापासून आजच्या युगापर्यंत घडणाऱ्या सर्व घटनांचा मूक साक्षीदार असणाऱ्या तळपत्या सूर्याचे दर्शन शेर शिवराजच्या पोस्टरवर घडते आणि टीझरमधूनही तो थरार पाहायला मिळतो आहे.