​दिल चाहता हैच्या वेळी आमिर खानने सोनाली कुलकर्णीला दिली होती वाढदिवसाला ही भेटवस्तू

सोनाली कुलकर्णीचा आज वाढदिवस असून तिला वाढदिवसाच्या दिवशी तिच्या कुटुंबियांसोबत आणि जवळच्या मित्रमैत्रिणींसोबत वेळ घालवायला खूप आवडतो. तसेच तिच्या वाढदिवसाला ती सोशल मीडियाच्या माध्यमातून नेहमीच चाहत्यांच्या संपर्कात राहाते. सोनालीचा यंदाचा वाढदिवस देखील ती अतिशय शांतपणे तिच्या कुटुंबियांसोबत साजरा करणार आहे. तिच्या मुलीने तिला वाढदिवसाला खूप छान गिफ्ट दिले आहे. सोनालीने याबाबत हिंदुस्थान टाईम्सशी बोलताना सांगितले आहे की, माझी मुलगी नुकतीच लिहायला शिकली आहे. तिने माझ्यासाठी एक खूप छान ग्रीटिंग कार्ड बनवले आहे. सोनाली नेहमीच तिच्या वाढदिवसाला आराम करण्यापेक्षा काम करणे पसंत करते. तिने आजवर तिचे अनेक वाढदिवस हे तिच्या चित्रपटांच्या सेटवरच घालवले आहेत. पण तिच्या सहकलाकारांनी तिला नेहमीच खूप चांगले सरप्राईज दिले आहे. दिल चाहाता है या चित्रपटाच्या चित्रीकरणाच्या वेळी देखील या चित्रपटाच्या टीमने तिला खूप चांगले सरप्राईज दिले होते. सोनालीचा वाढदिवस असल्याचे प्रिती झिंटाला कळल्यावर तिने ही गोष्ट चित्रपटाच्या टीममधील सगळ्यांना सांगितली होती. चित्रपटाच्या टीमने तिचा वाढदिवस खूप चांगल्या प्रकारे साजरा केला होता. आमिरने तिला भेटवस्तू म्हणून दोन पुस्तकं देखील दिली होती. सोनालीने हिंदी, मराठीप्रमाणे इटालियन चित्रपटामध्ये देखील काम केले आहे. या चित्रपटाच्या टीमने देखील गेल्या वर्षी तिचा वाढदिवस खूप चांगल्या प्रकारे साजरा केला होता. चित्रपटाच्या टीमने वाढदिवसाच्या सेलिब्रेशनसाठी केक, वाईन आणि स्नॅक्स आणले होते. एवढेच नव्हे तर त्यांनी सोनालीसाठी वाढदिवसाचे साँग खास इटालियन भाषेत गायले होते. सोनाली कुलकर्णीने आज केवळ मराठीच नव्हे तर हिंदी चित्रपटसृष्टीतही आपले स्थान निर्माण केले आहे. मराठीत तिने अगं बाई अरेच्चा २, डॉ. प्रकाश बाबा आमटे यांसारख्या अनेक चित्रपटांमध्ये काम केले आहे. डॉ. प्रकाश बाबा आमटे या चित्रपटासाठी तर तिला अनेक पुरस्कार देखील मिळाले आहेत. मराठीतील एक आघाडीची अभिनेत्री म्हणून तिच्याकडे आज पाहिले जाते. मिशन काश्मीर, दिल चाहाता है या हिंदी चित्रपटातील तिच्या भूमिका तर प्रचंड गाजल्या होत्या. Also Read : अभिनेत्री सोनाली कुलकर्णीला आहे या गोष्टीची आवड?