मेगास्टारसोबत काम करणार नागराज?

नागराज मंजुळे दिग्दर्शित ‘सैराट’ चित्रपटाने प्रेक्षकांच्या मनावर अधिराज्य गाजविले. एवढेच नाही, तर या चित्रपटाने आंतरराष्ट्रीय पातळीवर यश मिळविले. हा चित्रपट प्रदर्शित होऊन ९ महिने झाले असले, तरी त्याची चर्चा कायमच आहे. त्याचप्रमाणे या चित्रपटातील रिंकू राजगुरू आणि आकाश ठोसर यांच्या अभिनयाने प्रेक्षकांची मने जिंकली आहेत. तर या चित्रपटातील गाणी आजही प्रेक्षकांच्या ओठावर आहेत. म्हणूनच बॉलिवूडमध्ये अनेक कलाकार या चित्रपटाच्या प्रेमात पडलेले पाहायला मिळाले. त्यामुळेच या चित्रपटाचे यश पाहता, हा चित्रपट पाहण्याचा मोह बॉलिवूडचे बिग बी अर्थातच अमिताभ बच्चन यांनाही आवरला नाही. नुकतेच अमिताभ यांनी सोशल मीडियावर या चित्रपटाचे कौतुक केले होते. त्यामुळे पुन्हा या चित्रपटाची चर्चा रंगली होती. आता यापाठोपाठ आणखी गोष्ट समजत आहे, की नागराज मंजुळे यांच्या आगामी चित्रपटात बॉलिवूडचा शहेनशहा अमिताभ बच्चन प्रेक्षकांना पाहायला मिळणार आहे. होय, नागराज सध्या एका हिंदी चित्रपटामध्ये व्यग्र असल्याचे समजते. हा हिंदी चित्रपट सैराटचा रिमेकच असेल. करण जोहरची निर्मिती असणाऱ्या या चित्रपटाच्या संहितेवर सध्या काम सुरू आहे. या चित्रपटाच्या निमित्ताने नागराज मंजुळे आणि अमिताभ बच्चन पहिल्यादांच एकत्र काम करणार असल्याचे कळतेय. त्यामुळे प्रेक्षकांमध्ये म्हणून अमिताभ यांनी काही दिवसांपूर्वी सैराट हा चित्रपट पाहायला असेल, याची कुजबुज सुरू झाली आहे. बॉलिवूडच्या या रिमेकमध्ये श्रीदेवी यांची कन्या जान्हवी कपूर झळकणार आहे. जान्हवी ही आर्चीच्या भूमिकेत पाहायला मिळेल. मात्र, अमिताभ बच्चन कोणत्या भूमिकेत असणार, हे अद्यापदेखील कळाले नाही.