दाक्षिणात्य सिनेमासृष्टीतली लेडी सुपरस्टार म्हणून अभिनेत्री नयनताराला ओळखलं जातं. आत्तापर्यंत तिने विविध सिनेमांमध्ये काम केलं आहे.आपल्या उत्कृष्ट अभिनयाने आणि आपल्या सौंदर्याने वर्षानुवर्षे चाहत्यांची मने जिंकणाऱ्या नयनतारानं चित्रपटसृष्टीत २० वर्षे पूर्ण केली आहेत. सीनसृष्ट्रीत २० वर्षे पूर्ण झाल्याबद्दल नयनतारानं आनंद व्यक्त केला. आपल्या चाहत्यांसाठी तिनं खास पोस्ट केली आहे.
नयताराने इन्स्टाग्रामवर पोस्ट शेअर करत चाहत्यांचे मनापासून आभार मानले. तिनं लिहलं, 'माझ्या चाहत्यांनो हे खास तुमच्यासाठी...तुमच्यामुळेच २० वर्षांनंतरही मी इथे उभी आहे. तुम्ही सर्व जण माझी प्रेरणा आणि माझ्या करिअरच्या हृदयाचा ठोकाआहात. प्रत्येक वेळी जेव्हाही धडपडते, तेव्हा तुमच्यामुळेच मी पुन्हा उठते. तुमच्याशिवाय हा प्रवास अपुर्ण आहे. आज माईलस्टोन साजरा करत आहे. कारण, तुमच्या अविश्वसनीय, आश्वासक आणि प्रेरणादायी शक्तीने गेली दोन दशकांत सिनेमाला आकार दिला'.
नयनतारानं तिच्या कारकिर्दीत एकापेक्षा एक चित्रपट केले आहेत. गेल्या २० वर्षांत तिनं आपल्या उत्कृष्ट अभिनयाने प्रेक्षकांच्या हृदयात स्थान निर्माण केलं आहे. २००३ मध्ये आपल्या करिअरला सुरुवात केली होती. दक्षिण भारतातील तीन भाषांमध्ये आणि हिंदीतही नयनतारानं सुपरहिट सिनेमे दिले आहेत. २०१८ मध्ये, फोर्ब्स इंडियाच्या "सेलिब्रिटी १००" यादीत स्थान मिळवणारी दाक्षिणात्य चित्रपटसृष्टीतील ती पहिली महिला अभिनेत्री होती.