प्रिया मराठे मोठ्या पडद्यावर

आतापर्यंत विविध मालिकांतून भूमिका करत घराघरांत पोहोचलेल्या प्रिया मराठेने आता मोठ्या पडद्यावर पाऊल टाकले आहे. ‘विघ्नहर्ता महागणपती’ या चित्रपटातून प्रियाचे मराठी चित्रपटसृष्टीत पदार्पण होत आहे. मालिका गाजवणाऱ्या प्रियाला आता हा विघ्नहर्ता किती पावतो ते पाहणे औत्सुक्याचे ठरणार आहे. तिच्या या पदार्पणाबाबत बोलताना प्रिया म्हणते, मी नाटक आणि मालिका केल्या आहेत; चित्रपट हेच एक माध्यम माझे करायचे राहिले होते. ही इच्छा आता पूर्ण होत आहे. हा पहिलाच चित्रपट करताना मी जशी एक्साइट होते, तशीच नर्व्हससुद्धा होते. मात्र या चित्रपटात भूमिका करणाऱ्या अलका कुबल आणि इतर सिनिअर कलाकारांनी मला खूप सांभाळून घेतले.