बॉलिवूडमध्ये दरवर्षी अनेक चित्रपट येतात़ काही हिट होतात तर काही फ्लॉप. यापैकी काही चित्रपट वर्षानुवर्षे प्रेक्षकांच्या मनात घर करून राहतात. अनेक वर्षांनंतरही अशा चित्रपटांची चर्चा होते. असाच एक चित्रपट सध्या चर्चेत आहे. या चित्रपटाची एक क्लीप सध्या सोशल मीडियावर वा-याच्या वेगाने व्हायरल होतेय. यात रणबीर कपूर अर्थात कबीर थापर म्हणजेच बनी सिनेमाची नायिका नैना म्हणजेच दीपिका पादुकोण हिच्याशी फ्लर्ट करण्याचा प्रयत्न करतो. नैना बाथरूमध्ये आहे असे समजून तो फ्लर्ट करायला लागतो. पण होतं भलतच, तो ज्या महिलेशी फ्लर्ट करत असतो ती नैना नाही तर तिची आई असते. जेव्हा नैना मागून येते तेव्हा बनीला एकदम धक्काच बसतो आणि तिची आई बाथरूमधून बाहेर आल्यानंतर तर त्याची बोबडीच वळते. हा व्हिडीओ सध्या सोशल मीडियावर व्हायरल होत आहे.
नैना आणि बनी यावरून आम्ही कोणत्या चित्रपटाबद्दल बोलतोय, हे एव्हाना तुमच्या लक्षात आले असेलच. होय, आम्ही बोलतोय ते ‘ये जवानी है दीवानी’बद्दल. आता तुम्ही हा सिनेमा पाहिला असेल तर असा कुठलाही सीन तुम्हाला आठवूनही आठवणार नाही. होय, कारण चित्रपटात हा सीन चित्रपटातून कापण्यात आला होता. म्हणजेच हा डिलीटेड सीन आहे. चित्रपटातून हा सीन कापण्यात आला असला तरी सध्या सोशल मीडियावर तो खूप हिट झाला आहे. बनी आणि नैना आदितीच्या लग्नासाठी जयपूरमध्ये आलेले असतात. बनी व नैना जयपूरमध्ये फिरण्याचा प्लान बनवतात आणि बनी नैनाला पिक करण्यासाठी तिच्या घरी जातो असा हा सीन आहे. ‘ये जवानी है दीवानी’ हा चित्रपट 2013 मध्ये प्रदर्शित झाला होता. या चित्रपटातील दीपिका व रणबीरची जोडी चित्रपटाइतकीच सुपरहिट झाली होती. शिवाय चित्रपटाची गाणी देखील लोकांनी डोक्यावर घेतली होती.