बॉलिवूड असो, टॉलिवूड असो की हॉलिवूड... क्रेझी फॅन्स आपल्या आवडत्या स्टार्ससाठी काहीही करायला तयार असतात. फिल्मी स्टार्स आणि त्यांच्या क्रेझी फॅन्सचे अनेक क्रेझी किस्से तुम्ही वाचले असतील. आता हेच बघा ना, हॉलिवूडच्या एका सुपरस्टारनं च्युइंगम चघळलं आणि चघळून चघळून चोथा झालेलं ते च्युइंगम एकाक्षणी थुंकलं. हेच त्याने थुुंकलेलं च्युइंगम कितीला विकलं जावं तर त्या किमतीत तुमचा एक अलिशान फ्लॅट येईल.आश्चर्य वाटलं ना? पण हे खरं आहे. ऑनलाइन ई-कॉमर्स साइट ई-बे वर हा चघळलेला च्युइंगम लिलावाला काढला आहे. लाखो रूपयांत हा च्युइंगम विकला जात आहे. किंमत किती तर ४५ लाख... अर्थात ही लिलावाची बेस प्राइज आहे. एका चाहत्याने ३२ लाखांची पहिली बोली लावली आहे. या लिलावाची अंतिम तारीख 31 मार्च होती आणि बोली लावण्याची वेळ संपली आहे.
आता हे चघळलेलं च्युइंगम कोणाचं आहे?असा प्रश्न तुम्हाला नक्कीच पडला असेल. तर चघळलेला च्युइंगम हॉलिवूडचा प्रसिद्ध अभिनेता रॉबर्ट डाउनी ज्युनिअरचा (Robert Downey Jr) आहे. तोच रॉबर्ट डाउनी ज्युनिअर ज्याला अख्खं जग 'आयर्न मॅन' म्हणून ओळखतं.
रिपोर्टमध्ये केलेल्या दाव्यानुसार, 13 फेब्रुवारी 2023 रोजी लॉस एंजिल्समधील डॉल्बी थिएटरजवळ रॉबर्ट डाउनी ज्युनिअर हा चित्रपट निर्माता जॉन फावारोच्या हॉलिवूड वॉक ऑफ फेम स्टारचं अनावरण करण्यासाठी आला होता. यावेळी रॉबर्ट डाउनी ज्युनिअर आणि इंटरनॅशनल शेफ रॉय चोई हे चित्रपट निर्माते जॉन फावारो यांच्यासोबत उपस्थित होते. या कार्यक्रमादरम्यान रॉबर्टने तोंडातून च्युइंगम काढून जमिनीवर चिकटवलं. मग काय, एका माणसाने ते च्युइंगम उचललं आणि eBay वर लिलावासाठी ठेवलं. जो कोणी लिलाव जिंकेल त्याला प्लास्टिकच्या बॉक्समध्ये च्युइंगमचा तुकडा पाठविला जाईल, जो खरेदीदार परत करू शकत नाही.