अभिनेता रितेश देशमुख (Riteish Deshmukh) आणि अभिनेत्री जिनिलिया देशमुख(Genelia D'souza-Deshmukh)चा वेड चित्रपट (Ved Marathi Movie) ३० डिसेंबर रोजी रिलीज झाला. या चित्रपटाने प्रेक्षकांना अक्षरशः वेड लावले आहे. या चित्रपटाचे सर्व शो हाऊसफुल होताना दिसत आहेत. यातील कलाकारांचा अभिनय, कथानक, गाणी हे सर्वच प्रेक्षकांना आवडलं आहे. अनेकांनी या चित्रपटातील वेड लावलंय या गाण्यावर रिल बनवले आहेत. मात्र या गाण्यावर नाचता न आल्यामुळे सई ताम्हणकर (Sai Tamhankar) ट्रोलर्सच्या निशाण्यावर आली आहे.
अभिनेत्री सई ताम्हणकरचा सध्या वेड लावलंय या गाण्यावर डान्स करतानाचा एक व्हिडीओ व्हायरल होत आहे. मात्र या गाण्यावर नाचायला तिला अजिबात जमलं नाही. त्यामुळे सोशल मीडियावर तिला ट्रोल केले जात आहे. वेडमध्ये महत्त्वपूर्ण भूमिका साकारणारा अभिनेता शुभंकर तावडेने त्याच्या इन्स्टाग्राम अकाउंटवर एक व्हिडीओ शेअर केला आहे. या व्हिडीओत तो सईला वेड लागलंय या गाण्याच्या स्टेप्स शिकवताना दिसत आहे. यात आधी शुभंकर एक स्टेप करतो आणि नंतर सई ती फॉलो करते. पण या स्टेप्स फॉलो करत असताना सई चुकताना दिसते आहे. त्यामुळे या व्हिडीओवर कमेंट करत युजर्सनी तिला ट्रोल केले आहे.
या व्हिडीओवर कमेंट करत एका युजरने लिहिले की, सई ताम्हणकर एवढी मोठी अभिनेत्री असूनही तिला जमले नाही. माझी छोटीशी मुलगी छान करते. तर दुसरा युजर म्हणाला, स्टेप्स बघायला वेळ नाही मिळाला म्हणून तू शिकवतोय… पण काय फायदा, तिने ते चुकीचे केले. आणखी एका युजरने लिहिले की, तुला डान्स आणि अॅक्टिंग येत नाही.