रितेश देशमुख आणि जिनिलीया देशमुख यांच्या वेड सिनेमाची भुरळ संपूर्ण महाराष्ट्राला पडली आहे. हा चित्रपट ३० डिसेंबरला प्रदर्शित झाला. या चित्रपटाच्या घोषणेपासूनच हा चित्रपट चर्चेत आला होता. हा चित्रपट प्रदर्शित झाल्यावर प्रेक्षकांनी डोक्यावर घेतला. वेड चित्रपटातूनरितेश देशमुखने दिग्दर्शनात पदार्पण केले. तर जिनिलीया देशमुखने मराठी सिनेइंडस्ट्रीत पदार्पण केले. अशा परिस्थितीतही रितेश आणि जिनिलिया प्रेक्षकांचे मनं जिंकण्यात कुठेही कमी पडलेले नाहीत. वे़ड चित्रपटाने प्रेक्षकांना चांगलीच भुरळ घातली आहे. आतापर्यंत या चित्रपटाने एकूण ३५.७७ कोटींची कमाई केली आहे. चित्रपटातील गाणीही रिलीज आधीपासूनच सुपरहिट झालीत. बॉलिवूड सेलिब्रेटीही रितेशच्या वेड सिनेमातील गाण्यावर थिरकताना दिसले.
वेड या चित्रपटाला खूप चांगला प्रतिसाद मिळतो आहे. आता सैराट फेम रिंकू राजगुरुलाही रितेशच्या सिनेमातील गाण्याची भुरळ पडली आहे. अभिनेत्री रिंकू राजगुरूनेही या सिनेमातील गायिका श्रेया घोषालच्या आवाजातील गाणे 'सुख कळले'वर एक रील शेअर केलं आहे.
अभिनेता रितेश देशमुखने हे रील त्याच्या इन्स्टाग्राम स्टोरीवर शेअर केले आहे. विशेष म्हणजे रिंकू राजगुरुच्या ‘एका दिवसात सर्वाधिक कमाई करणारा मराठी चित्रपट’ हा सैराटच्या नावे असलेला विक्रम ‘वेड’ने मोडला. आता सैराटच्या आर्चीला ‘वेड’ची भुरळ पडली आहे.
वेड चित्रपटाच्या टीझरला, सगळ्या गाण्यांना आणि ट्रेलरला प्रेक्षकांनी खूप भरभरून प्रतिसाद दिला होता. या चित्रपटात रितेश-जिनिलियाबरोबरच अभिनेते अशोक सराफ, शुभंकर तावडे, जिया शंकर हे कलाकार प्रमुख भूमिकेत आहेत. अभिनेता सलमान खानदेखील या चित्रपटात पाहुण्या कलाकाराच्या भूमिकेत झळकला.