Salman Khan Fan : आपल्या लाडक्या कलाकाराला भेटायचे म्हणले की चाहते काय नाही करत. त्यात कलाकाराचा वाढदिवस असेल तर त्यांना सरप्राईज देण्यासाठी चाहते दिवसरात्र एक करतात. आता हेच बघा बॉलिवुडचा दबंग म्हणजेच सलमान खानचे चाहते जगभरात आहेत. सलमानच्या वाढदिवशी त्याला भेटता यावे म्हणून एक चाहता सायकलवरुन चक्क ११०० किलोमीटरचा प्रवास करत निघाला आहे.
बॉलिवुडचा भाईजान सलमान खानचा २७ डिसेंबरला वाढदिवस आहे. सलमानची एक झलक पाहण्यासाठी चाहते त्याच्या बांद्रा येथील घराखाली गर्दी करतात. त्याच्यासाठी केक, गिफ्ट्स आणतात. पण एक चाहता असा आहे जो सायकलवरुन मोठा लांबचा प्रवास करत मुंबईला फक्त सलमानसाठी येणार आहे. भारतातील पहिल्या सलमान खान फॅन क्लबचा एक सदस्य समीर हा जबलपुरवरुन सलमान खानला भेटण्यासाठी निघाला आहे. २७ डिसेंबरपर्यंत समीरला ११०० किलोमीटर पार करत मुंबईत पोहोचावे लागणार आहे.त्यात आता थंडी पडायला लागली आहे त्यामुळे समीरचा हा प्रवास फार आव्हानात्मक असणार आहे. पण अशी तुफानी कामगिरी करणारे सलनान खानचे चाहतेच असू शकतात. समीरने याआधीही पापण्यांवर सलमान खानचे नाव लिहिले होते. त्याच्या हातावर सलमान खानचा टॅटूही आहे.
सलमान खानचा पुढील वर्षी टायगर ३ (Tiger 3) हा चित्रपट रिलीज होतोय. तसेच शाहरुख खानच्या (Shahrukh Khan) पठाण (Pathaan) सिनेमात सलमानने कॅमिओ केला आहे. याशिवाय सलमानचा किसी का भाई किसी की जान हा चित्रपट देखील प्रदर्शित होण्यास सज्ज आहे.